Qazaqstanda sheneýnikterdiń zańsyz baiyǵany úshin azamattyq-quqyqtyq jaýapkershilik engizý máselesi qarastyrylyp jatyr. Bul týraly QR Sybailas jemqorlyqqa qarsy is-qimyl agenttiginiń tóraǵasy Alik Shpekbaev Facebook paraqshasynda jazdy, dep habarlaidy "Ult aqparat".
«Prezidenttiń 2021 jyldyń sońyna deiin memlekettik qyzmetshiler men kvazimemlekettik sektor qyzmetkerleriniń sanyn 25 paiyzǵa qysqartýdy jedeldetý sheshiminiń strategiialyq mańyzdylyǵyn erekshe atap ótken jón. Osylaisha, laýazymdyq jalaqylaryn eki ese ulǵaita otyryp, eńbekaqy tóleýdiń faktorlyq-balldyq júiesine tolyqqandy kóshý memlekettik qyzmettegi sybailas jemqorlyqtyń aldyn-alý baǵytyndaǵy taǵy bir daýsyz artyqshylyq bolady. Qazirgi tańda Úkimetpen birlesip, EYDU, GREKO, BUU usynymdarynan týyndaityn sybailas jemqorlyqqa qarsy bastamalar pysyqtaldy. Olardyń negizgisi – sheneýnikterdiń zańsyz baiyǵany úshin azamattyq-quqyqtyq jaýapkershilikti engizý. 2021 jyldan bastap jalpyǵa birdei deklaratsiialaýdyń birinshi kezeńin iske qosýdy eskere otyryp, biz kelesi tetikti usynamyz. Bastapqy kiris deklaratsiiasynda memlekettik qyzmetshi óziniń barlyq aktivterin tirkeidi. Eger kezekti deklaratsiiany tapsyrý kezinde onyń negizdei almaityn tabysynyń edáýir ósýi anyqtalsa, oǵan memlekettik qyzmetten bosatý jáne negizsiz asyp ketken somany tárkileý sharasy qoldanylady», - dedi Alik Shpekbaev.
Sonymen qatar onyń atap ótýinshe, damyǵan elderde qoldanylatyn kásibi satylmaýshylyqqa tekserý institýtyn engizý birshama aldyn alý áserin beretin bolady.
«Sondai-aq, kún tártibinde memlekettik qyzmetshi emes, biraq jariialyq mindetterdi oryndaityn tulǵalarǵa sybailas jemqorlyqqa qarsy zańnamany qoldaný máselesi de bar. Iaǵni, biz para alǵany úshin kommertsiialyq bankterdiń top-menedjerlerin, tabiǵi monopoliialar sýbektileriniń basshylaryn, jeke sot oryndaýshylaryn jáne jariia qyzmetshilerdiń basqa sanattaryn memlekettik qyzmetshiler syndy qylmystyq jaýapkershilikke tartýdy usynamyz. Bul tájiribe búkil álemde keń taralǵan. Búgingi tańda qoǵamnyń sybailas jemqorlyqty barynsha azaitýǵa degen talpynysy burynǵydan da zor. Sondyqtan jemqorlyqqa qarsy keshendi reformalardyń ózektiligin asyra baǵalaý múmkin emes. Elbasy men Memleket basshysynyń tolyq qoldaýyna ie bola otyryp, biz aldymyzǵa Qazaqstanda sybailas jemqorlyqqa qarsy eń pármendi quraldardy engizý maqsatyn qoiamyz. Bul – ekonomikalyq ósý men azamattardyń ál-aýqatyn arttyrýdyń negizgi sharty», - dedi Alik Shpekbaev.
