Búgin Parlament Májilisinde «Qazaqstan Respýblikasynyń keibir zańnamalyq aktilerine kólik máseleleri boiynsha ózgerister men tolyqtyrýlar engizý týraly» zań jobasy tanystyryldy, dep habarlaidy QazAqparat.
QR Indýstriia jáne infraqurylymdyq damý vitse-ministri Berik Kamaliev zań jobasynyń negizgi maqsattary joldarda kóliktik baqylaýdy avtomattandyrý, teńiz kóligi salasyndaǵy halyqaralyq sharttardyń normalaryn implementatsiialaý, temirjol kóligindegi oqiǵalardy jáne kemelerde bolǵan avariialyq jaǵdailardy tergeý tártibin jetildirýge arnalǵanyn aitty. Sonymen qatar, Qazaqstan Respýblikasy zańnamasyn Halyqaralyq Azamattyq aviatsiia uiymy standarttarynyń talaptaryna jáne Eýropalyq Odaqtyń aviatsiialyq talaptaryna keltirý, áýeailaq mańyndaǵy aýmaqta qyzmetti júzege asyrýǵa ruqsat alý tetigin retteý eskerilgen.
«Júkterdi avtomobilmen tasymaldaýdyń joǵary qarqyndylyǵy jol tóseminiń merziminen buryn buzylýyna jol bermeý boiynsha túbegeili sharalardy qabyldaýdy talap etedi. Osy maqsatta «2020-2025 jyldarǵa arnalǵan Nurly jol» baǵdarlamasy boiynsha joldarda kólik quraldarynyń salmaqtyq jáne gabarittik parametrlerin ólsheitin avtomattandyrylǵan stantsiialardy ornatý josparlanýda. Zań jobasynda ólsheý stantsiialaryn ornatý jáne olardyń jumys isteý tártibin aiqyndaityn normalar kózdelgen», - dedi vitse-ministr.
Onyń aitýynsha, bul rette stantsiialar adamnyń qatysýynsyz «Sergek» qaǵidaty boiynsha jumys isteitin bolady. Usynylyp otyrǵan sharalardy iske asyrý avtojoldardyń saqtalýyn qamtamasyz etýge, aýyr salmaqty kólikterdiń jol júrgeni úshin biýdjetke túsetin alymdar túsimin jyl saiyn 1,5 mlrd teńgege arttyrýǵa jáne avtojoldarda kóliktik baqylaý júrgizý kezinde adami faktordy boldyrmaýǵa múmkindik beredi.
«Biyldyń 31 naýryzynda Qazaqstan Respýblikasy batyp ketken kemelerdi shyǵarý týraly 2007 jylǵy Nairobi halyqaralyq konventsiiasyn ratifikatsiialady. Osyǵan bailanysty, zań jobasynda keme iesiniń sýǵa batqan múlikti kóterý jónindegi óziniń azamattyq-quqyqtyq jaýapkershiligin saqtandyrý jónindegi mindetin belgileitin Konventsiia talaptaryn implementatsiialaý jónindegi normalar kózdelgen. Usynylyp otyrǵan normalar Qazaqstanǵa sýǵa batqan kemeni kóterý boiynsha shyǵyndardy óteý týraly talaptardy tikelei saqtandyrý kompaniiasyna usynýǵa múmkindik beredi. Qazirgi tańda Qazaqstannyń aýmaqtyq sýlarynda batyp ketken 10 kemeniń, onyń ishinde irandyq Tiba qurǵaq júk kemesiniń (2015 jyly batyp ketken) jáne reseilik «Araks» kemesiniń (2016 jyly batyp ketken) qaldyqtary bar», - dedi B.Kamaliev.
