Aldaǵy memlekettik qyzmetshiler kúnine orai «Qazaqstan respýblikasynyń úzdik memlekettik qyzmetshisi» respýblikalyq konkýrsy qashyqtan ótkiziledi, dep habarlaidy "Ult aqparat" Memlekettik qyzmet isteri agenttigine silteme jasap.
Atalǵan konkýrs memlekettik apparat qyzmetkerleriniń básekege qabilettiligin, áleýetin damytý, úzdik kásibi bilimi men daǵdylardy taratýdy kózdeidi.
Memlekettik qyzmet isteir agenttiginiń resmi ókili Erhan Tatkenniń aitýynsha, osy jyly koronovirýs pandemiiasyna bailanysty baiqaý qashyqtan ótkiziledi jáne eki negizgi kezeńnen turady.
Birinshi kezeń – óńirlik (oblystyq) deńgeide ótkiziletin konkýrs. Birinshi kezeńniń jeńimpazdary konkýrstyń ekinshi kezeńine qatysýǵa usynylady.
Ekinshi kezeń – respýblikalyq baiqaý komissiiasy ótkizetin respýblikalyq deńgeidegi konkýrs. Ekinshi kezeńniń qorytyndysy boiynsha konkýrs jeńimpazdary anyqtalatyn bolady.
«Talaptarǵa sáikes, konkýrsqa memlekettik qyzmettegi ótili bir jyldan kem emes, ákimshilik jáne tártiptik jaza berilmegen memlekettik qyzmetshi qatysady.
Árbir qatysýshy konkýrstyń bastapqy kezeńinde «Nege men úzdik memlekettik qyzmetshi ataǵyna laiyqpyn» taqyrybynda óziniń motivatsiialyq essesin tapsyrǵan bolatyn.
Motivatsiialyq essede úmitkerdiń kásibi qyzmettegi negizgi jeke jetistigi, qyzmet salasyndaǵy problemany sheshýge, memlekettik organnyń júktelgen mindetter men fýnktsiialaryn iske asyrý protsesine qosqan jeke úlesi baiandalady», - dep atap ótti Erhan Tatken. .
Eske sala keteiik, konkýrsqa qujattardy qabyldaý 2020 jylǵy 29 mamyrda aiaqtalǵan bolatyn. Konkýrsqa qatysý úshin 761 ótinish túsken. Onyń 565 – jergilikti atqarýshy organnyń, 196-sy ortalyq memlekettik organ jáne onyń aýmaqtyq departamentiniń qyzmetkerleri.
Memlekettik qyzmetshiler arasyndaǵy bul konkýrs 2017 jyldan bastap ótkizilip keledi. Osydan úsh jyl buryn konkýrsqa 300-den astam memlekettik qyzmetshi qatyssa, biylǵy jyly olardyń sany 2 esege artqan.
Jalpy konkýrs barysynda qatysýshylar tiisti rásimderden ótýi qarastyrylǵan.
Búginde qatysýshylar ózderine berilgen keistik tapsyrmany sheshýdi júzege asyryp, jaýaby beineformatta joldandy.
Al, 8-12 maýsym aralyǵynda konkýrstyń finalisteri «Memlekettik qyzmetti jetildirý: pandemiia nátijesi boiynsha memlekettik qyzmetshiniń qorytyndylary» taqyrybyna beine prezentatsiia joldaidy. Beine jazba uzaqtyǵy 5 minýttan aspaýy qajet.
Respýblikalyq komissiianyń otyrysy qashyq formatynda 15-19 maýsym aralyǵynda ótkiziledi. Jeńimpazdar «Jyldyń úzdik memlekettik qyzmetshisi» tós belgisimen, diplommen jáne estelik syilyqpen marapattalady.
