Ótken jylmen salystyrǵanda Qazaqstanda ushaq bileti 9 paiyzǵa arzandady, dep habarlaidy Energyprom.kz saity.
2020 jyldyń qańtar-qyrkúieginde elimizdiń áýe kómpaniialary 3,8 mln jolaýshy tasymaldady. Bul - ótken jyldyń 9 aiyndaǵy kórsetkishten 40,4 paiyz az. Qyrkúiekte áýe tasymaly 608,5 myń jolaýshy boldy. Bul osy jyldyń tamyzymen salystyrǵanda 13,1 paiyz kóp bolǵanymen ótken jyldyń qyrkúiegine qaraǵanda 19,7 paiyz kem.
9 aidaǵy jolaýshylar ainalymy 5,9 mlrd jolaýshy shaqyrymdy qurap, jyl ishinde 2,2 ese qysqardy. Qyrkúiekte jolaýshylar ainalymy 941,8 mln jolaýshy shaqyrym boldy. Bul kórsetkish tamyzǵa qaraǵanda 46,5 paiyz joǵary bolǵanymen ótken jyldyń qyrkúiegimen salystyrǵanda 35,5 paiyzǵa tómen.
Osy jyldyń 9 aiynyń qorytyndysynda áýe kemesimen júk tasymaly 15,5 myń tonnany qurap, ótken jylmen salystyrǵanda 18,7 paiyzǵa kemidi. Qyrkúiekte 2,5 myń tonna júk tasymaldandy. Bul tamyzdaǵy kórsetkishten 18,2 paiyzǵa az.
Sonymen qatar esepti kezeńde áýe kompaniialarynyń tabysy 54,3 paiyzǵa, 135,8 mlrd teńgege deiin qysqardy. Mundai teris dinamika sońǵy 4 jylda alǵash ret baiqalady.
2020 jyldyń qyrkúieginde jolaýshylar áýe kóligi qyzmetteriniń quny ótken jyldyń qyrkúiegimen salystyrǵanda 8,7 paiyzǵa arzandady. Elimizdiń 17 óńiri ishinde Batys Qazaqstan (36,1 paiyz), Atyraý (13,1), Qaraǵandy (5,6) jáne Qostanai (4,5) oblystarynda ǵana baǵa ósimi tirkeldi.
Aqmola, Almaty, Soltústik Qazaqstan jáne Túrkistan oblystarynda baǵa turaqty. Elordada baǵa tómendeýi 36,5, Shymkentte 36,3 jáne Mańǵystaý oblysynda 24,7 paiyzdy qurady.
