Foto: depositphotos.com
Qazaqstanda salynatyn úsh jańa JEO-nyń aldyn ala quny belgili boldy, - dep habarlaidy Tengrinews.kz saity.
Úkimet otyrysynda "Samuryq-Energo" AQ basqarma tóraǵasy Qairat Maqsutov Kókshetaýdaǵy JEO qýaty 240 megavatt, Semeide - 360 megavatt, Óskemende 360 megavatt bolatynyn aitty. Jobalardy iske asyrý jónindegi ýákiletti uiymdar retinde "Samuryq-Energo" jáne "INTER RAO Eksport" bekitilgen.
"Kórsetilgen úsh qalada jylý elektr ortalyqtaryn salý úshin sýbsidiialanǵan mólsherleme boiynsha jeńildikti qarjylandyrýdy qamtamasyz etý shartymen Resei Federatsiiasynda óndirilgen negizgi tehnologiialyq jabdyqtardy paidalaný josparlanǵan", - dedi Qairat Maqsutov.
Qazirgi ýaqytta Kókshetaýda JEO boiynsha TEN ázirleý aiaqtaldy, Semeidegi JEO boiynsha TEN biyl naýryzda daiyn bolady, al Óskemendegi JEO boiynsha 2024 jyldyń aiaǵyna deiin oryndai otyryp, TEN ázirleýge kirisýdi josparlap otyrmyz.
"Kókshetaý jáne Semei JEO boiynsha EPC-kelisimshartqa qol qoiý biyl 3-toqsanda, Óskemen JEO boiynsha - 2025 jyldyń 1-toqsanynda boljanady. Qurylystyń aiaqtalýy - 2027-2028 jyldary", - dedi Maqsutov.
Tóraǵa usynǵan slaidtarda árbir jylý elektr ortalyǵynyń aldyn ala quny kórsetilgen:
- Kókshetaý JEO – 347 milliard teńge;
- Semei JEO – 420 milliard teńge;
- Óskemen JEO – 490 milliard.
Úkimet otyrysynan keiingi brifingte Maqsutov jobalardyń quny "áli bekitilgen joq" dep málimdedi.
"Naqty somaǵa keletin bolsaq, ony aita almaimyz. Ol memlekettik saraptamadan ótkennen keiin belgili bolady. Jariialanǵan soma boljamdy. Quny áli bekitilgen joq", - dedi ol.
