Astanada QR Premer-Ministriniń orynbasary Imanǵali Tasmaǵambetovtiń qatysýymen joǵary oqý oryndarynyń basshylary laýazymyna úmitkerlerdi anyqtaý boiynsha Respýblikalyq konkýrstyq komissiianyń otyrysy ótti.
Otyrys barysynda Respýblikalyq komissiia músheleri usynylǵan qujattarmen tanysyp, konkýrs qatysýshylarymen suhbat júrgizdi. Onda úsh ýniversitettiń rektory laýazymyna úmitkerler irikteldi. Atap aitqanda, Qaraǵandy memlekettik tehnikalyq ýniversiteti, I. Jansúgirov atyndaǵy Jetisý memlekettik ýniversiteti jáne Pavlodar memlekettik pedagogikalyq institýty.
Barlyq úmitkerler joǵary bilimi, 5 jyldan kem emes basshylyq laýazymda jumys ótiliniń bolýy, sondai-aq, JOO damytý baǵdarlamasynyń bolýy jaǵynan qoiylyp otyrǵan talaptarǵa sáikes keletinin atap ótken jón. Sapalyq quramy jaǵynan baiqaýǵa bilim jáne ǵylym júiesiniń 26 ókili qatysty (16 ǵylym doktory, 8 ǵylym kandidaty).
Úmitkerlermen suhbat jáne olar usynǵan JOO damytý baǵdarlamasyn talqylaý nátijesinde Respýblikalyq konkýrstyq komissiia Qaraǵandy memlekettik tehnikalyq ýniversitetiniń rektory bos laýazymyna taǵaiyndaýǵa Marat Ibatovty, I. Jansúgirov atyndaǵy Jetisý memlekettik ýniversitetiniń rektory laýazymyna Qýat Baimyrzaevty jáne Pavlodar memlekettik pedagogikalyq institýtynyń rektory bos laýazymyna Altynbek Nuhulyn taǵaiyndaýdy usyndy.
Eske sala ketsek, aǵymdaǵy jyldan bastap Qazaqstanda memlekettik JOO-nyń rektorlaryn taǵaiyndaý erejesi ózgerdi. Endi jańa talaptarǵa sáikes rektorlardyń taǵaiyndalýy ashyq konkýrs negizinde júrgiziledi. Buǵan deiin memlekettik joǵary oqý oryndarynyń rektorlary QR Bilim jáne ǵylym ministriniń jeke sheshimimen taǵaiyndalyp keldi. Sondyqtan, rektorlar korpýsynyń biraz bóligi atalǵan laýazymda 3 jyl saiyn 2 merzimnen asa ýaqyt ielenip keldi. Buǵan deiin habarlanǵandai, bul jańashyldyq qazaqstandyq joǵary oqý oryndarynyń basqarý quramyn sapaly toltyrý jáne basqarý derbestigin ulǵaitý, sondai-aq, qoǵam aldyndaǵy eseptilikti kúsheitý qajettiginen týyndap otyr.
Aǵymdaǵy aidyń qazan aiynda JOO-nyń baqylaýshy keńesteriniń otyrystary ótkizildi, onda úmitkerler usynǵan oqý ornyn damytý baǵdarlamalary qaraldy. Onyń qorytyndysynda JOO-nyń baqylaýshy keńesteri qupiia daýys berý arqyly Respýblikalyq komissiia qaraýyna usyný úshin kandidattardy anyqtady.
"Ult aqparat"
