Jer qoinaýyn paidalanýshylardyń qarajatyna júrgizilgen geologiialyq barlaý jumystarynyń arqasynda eldegi ýran qory 469 myń tonna kenmen tolyqqan, dep habarlaidy QazAqparat.
QR Ekologiia, geologiia jáne tabiǵi resýrstar vitse-ministri Serikqali Brekeshev ortalyq kommýnkatsiialar qyzmetinde ótip jatqan brifingide osyndai málimet berdi.
«Jumys istep turǵan kásiporyndardyń mineraldyq-shikizat áleýetin nyǵaitý jáne shikizat bazasyn qamtamasyz etý úshin 1991 jyldan bastap júrgizilgen geologiialyq barlaý jumystarynyń nátijeleri boiynsha alǵash ret kómirsýtegi shikizatynyń 135 ken orny, jerasty sýlarynyń 99 ken orny, qatty paidaly qazbalardyń 224 ken orny memleket menshigine alyndy. Onyń ishinde 94 – altyn, 14 – mys, 19 – marganets kenderiniń, 16 – temir kenderiniń, 4 – polimetaldardyń qory bar», - degen ministrdiń orynbasary birneshe eski kenishterdiń qory qosymsha barlaý arqyly kóbeitilgenin atady.
«Buryn zerttelgen ken oryndarynyń shikizat bazasy ulǵaityldy. Vasilkovskii ken ornynyń qorlary birneshe ese ósti. Jer qoinaýyn paidalanýshylardyń óz kúshimen júrgizgen barlaý jumystarynyń qorytyndysy altynnyń – 1,9 myń tonna, ýrannyń – 469 myń tonna; marganets keniniń – 160,7 mln tonna, temir keniniń– 2,9 mlrd tonna, munaidyń – 2,5 mlrd tonna, gazdyń – 506 mlrd tekshe metr, gaz kondensatynyń – 277,2 mln tonna qory anyqtaldy», - dedi vietse-ministr.
