Qazaqstanda "Ulttyq rýhani jańǵyrý" baǵdarlamasyn júzege asyrýǵa 119 milliard teńge jumsalmaq. Bul týraly aqparat jáne qoǵamdyq damý ministri Aida Balaeva málimdedi, - dep habarlaidy Tengrinews.kz tilshisi.
"Ulttyq rýhani jańǵyrý" ulttyq jobasy 2021-2025 jyldarǵa arnalǵan. Joba mindetteriniń ishinde ziiatkerlik áleýetti damytý, qazaq tiliniń damýyna jaǵdai jasaý, jastar úshin jańa múmkindikterdi ashý sekildi máseleler qarastyrylǵan.
"Jobanyń biýdjeti 119 milliard teńge. Bul joba 2025 jylǵa deiin júzege asyrylady. Ideologiia - bul belgili bir sala, ony alǵa jyljytý memleket úshin qolaily. Shyn máninde, bul - adamdardyń sanasyna investitsiia salý, onyń qaitarymy qoǵam ómiriniń barlyq salalarynda: ekonomikada, áleýmettik salada, mádeniette, bilim berýde jáne t.b. kórinedi. Sondyqtan bul somanyń basym bóligi, respýblikalyq biýdjetten 110 milliard jáne 9 milliard jergilikti biýdjetten bólinetin bolady.
Ár teńgeni mamandar egjei-tegjeili eseptep, ár joba muqiiat qarjylyq saraptamadan ótti. Sonymen qatar, bul jobalardy júzege asyrý barysy turaqty baqylaýda bolady", - dedi Balaeva OKQ brifinginde
Joba baǵyttarynyń biri "El rýhy" dep atalady. Ol mádeniet salasyndaǵy qyzmetterdiń qoljetimdiligin arttyrýǵa, sondai-aq otandyq mádeni ónimderdi shetelde damytý jumystary boiynsha sharalar keshenin biriktiredi.
Balaevanyń aitýynsha, ol boiynsha 250 jańa nysan salynyp, 1200 mádeniet nysany kúrdeli jóndeýden ótedi. Joba aiasynda kinoprokattaǵy otandyq filmderdiń úlesi 25 paiyzǵa deiin ósedi. "Qazaq animatsiia" shyǵarmashylyq birlestigi taǵy da 40 animatsiialyq film shyǵarady.
"Aýyl jáne shalǵai eldi meken turǵyndarynyń 92,5 paiyzy mádeniet salasynyń qyzmetterimen qamtylatyn bolady. Jalpy, mádeniet nysandaryn aralaýdy eki esege, al halyqtyń mádeniet salasyndaǵy qyzmet sapasyna qanaǵattaný deńgeiin 75 paiyzǵa deiin arttyrý josparlanyp otyr", - dedi ministr.
Taǵy bir baǵyt jastardy qoldaýǵa arnalǵan. Osy baǵdarlama aiasynda 800 myń jas otbasy turǵyn úimen, bir millionǵa deiingi jastar áleýmettik qyzmetterimen qamtylady.
"Turǵyn úi baǵdarlamalary boiynsha jas otbasylar úshin qaryzdar úlesin 25 paiyzǵa deiin arttyrý, 1,5 million jastardy buqaralyq sportpen jáne ekologiialyq jobalarmen qamtý. NEET kategoriiasy dep atalatyn jastardy qoldaý sharalaryna erekshe nazar aýdaramyz, onda biz naqty mindet qoiyp, jumyspen qamtylmaǵan jastardyń sanyn 5 paiyzǵa deiin azaitamyz. 2025 jylǵa qarai jastardyń memlekettik qoldaý sharalaryna qanaǵattaný deńgeii 80 paiyzǵa deiin artady", - dedi Aida Balaeva.
