Ulttyq qoǵamdyq senim keńesiniń múshesi, qoǵam qairatkeri Raýan Kenjehanuly Qazaqstanda ulttyq mektep úlgisin jasaýdy usyndy, dep habarlaidy QazAqparat.
«Elimizdiń bilim berý salalarynda júrip jatqan ózgerister negizinen halyqaralyq talaptardy eskerip, naqty ǵylymdar men tehnologiia, aǵylshyn tilin oqytý baǵyttaryna basymdyq berdi. Sózsiz, bul - óte mańyzdy jáne qajet. Degenmen, bilim berýdiń álemge ortaq standarttary, halyqaralyq uiymdardyń PISA sekildi bilim sapasyn ortaq baǵalaý quraldary jáne ol uiymdardyń aqyl-keńesteri saiyp kelgende, álemdik naryqqa ámbebap maman daiyndaýǵa, Qazaqstan sekildi elderdiń qabiletti degen balalaryn damyǵan elge tartýǵa, jalpy alǵanda, álem azamattaryn tárbieleýge baǵyttalǵany aidan anyq», - dep atap ótti spiker Ulttyq qoǵamdyq senim keńesiniń onlain formattaǵy 3-otyrysynda.
Onyń aitýynsha, álem azamaty rýhynda bilim men tárbie alǵan bala Qazaqstannyń naǵyz janashyry bolyp ósýi ekitalai. Sondyqtan, Qazaqstanǵa ulttyq mektep úlgisi qajet.
«Naqty ǵylymdar, tehnologiia, aǵylshyn tilimen qatar, tipti odan buryn qazaq tili men ádebieti, Qazaqstannyń tarihy men ólketanýy, ult óneri men dástúrin ozyq ádisteme negizinde jańasha oqytatyn, sol arqyly álem azamaty emes, biraq álemnen habary bar Qazaqstan azamatyn tárbieleitin ult mektebiniń úlgisin jasaýdy usynamyz. Mundai mekteptiń baǵdarlamasyn qurastyrýǵa Keńeske múshe azamattar da úles qosady dep oilaimyz. Ózimiz de oǵan belsene aralasýǵa daiynbyz», - dedi Raýan Kenjehanuly.
Buǵan deiin R. Kenjehanuly Qazaqstan mektepterin bir aýysymda oqý rejimine kóshirýdi usynǵan bolatyn.
