Búgin Qazaqstanda Ulttyq biryńǵai testileýdi ótkizý sharalary bastaldy, dep habarlaidy "Ult aqparat".
Atap aitqanda, 2019 jyldan bastap joǵary oqý ornyna aqyly negizde túsý úshin UBT-ny jylyna 4 ret (qańtar, naýryz, maýsym, tamyz) tapsyrýǵa bolady. Bilim berý grantyn taǵaiyndaý konkýrsyna qatysý úshin oqýǵa túsýshiler maýsym aiynda ótetin UBT-ny tapsyrýy qajet.
«Jalpy, synaqty tapsyrý formatynda ózgeris joq. Bul norma joǵary bilim alýǵa qoljetimdilikti arttyrý maqsatynda engizildi», - delingen Bilim jáne ǵylym ministrligi málimetinde.
Ulttyq biryńǵai testileýdi ótkizý qaǵidalaryna sáikes, 2019 jylǵy 18-20 qańtar aralyǵynda UBT ótkizýdiń 74 pýnkti bazasynda testileý júrgiziledi.
Eske sala keteiik, UBT-ǵa qatysý úshin qujattardy qabyldaý biryńǵai aqparattyq júie arqyly 2018 jylǵy 1-15 jeltoqsan aralyǵynda júzege asyryldy. Nátijesinde, testileýge qatysýǵa 35 838 adam ótinish bildirdi. Onyń ishinde, qazaq tilinde - 25 615, orys tilinde - 10 162, aǵylshyn tilinde - 61 oqýshy.
UBT ótkizý úshin jergilikti jerlerde 444 adamnan turatyn UBT uiymdastyrý jáne ótkizý boiynsha memlekettik komissiia quryldy. Onyń quramyna oblystar nemese respýblikalyq mańyzy bar qalalar ákimdikteriniń ókilderi, quqyq qorǵaý organdarynyń, qoǵamdyq uiymdardyń, buqaralyq aqparat quraldarynyń ókilderi kiredi. Qańtar aiynda ótkiziletin synaqta 520 aýditoriia paidalanylady.
Budan buryn habarlanǵandai, ministrlik ókili 2019 jyly ótkiziletin Ulttyq biryńǵai testileýdiń nazar aýdararlyq bes pýnktin ataǵan bolatyn.
