Elimizde úkimettik emes uiymdardy qarjylandyrýdyń jańa mehanizmi ázirlenip jatyr. Bul týraly QR Aqparat jáne qoǵamdyq damý ministri Asqar Ýmarov málim etti, dep habarlaidy QazAqparat.
«Granttyq qarjylandyrý salasyndaǵy problemalardy sheshý úshin ministrlik qazirgi ýaqytta halyqaralyq tájiribe negizinde azamattyq qoǵam sarapshylarymen birlese otyryp, granttyq qarjylandyrý salasyndaǵy zańnamany jetildirý boiynsha jumys júrgizýde. Granttardy halyqtyń qajettiligine baǵyttaýǵa múmkindik beretin ózekti baǵyttar boiynsha pýldar qalyptastyrý arqyly granttardy josparlaýdyń jańa formatyn engizý usynylady», - dep jaýap berdi Asqar Ýmarov depýtattyq saýalǵa.
Ministrdiń málimdeýinshe, atalǵan shara halyqaralyq praktikada keńinen paidalanylatyn «tómennen joǵary» tásilin engizýge múmkindik beredi.
Sonymen qatar qoǵamdyq bastamalardyń qazirgi kezdegi kún tártibine ikemdelip, jedel den qoiýdy qamtamasyz etedi.
«Sondai-aq, gradýirlengen granttar júiesin engizý usynylady. Granttyń túrine qarai qarjylandyrý kólemine, iske asyrý merzimderine, ÚEU úshin konkýrsqa qatysý sharttaryna qoiylatyn ártúrli talaptar, eseptilikke qoiylatyn talaptar aiqyndalatyn bolady. Mundai tásil granttyq qarjylandyrý rásimderin jeńildetýge múmkindik beredi», - deidi ol.
Bul normalar «Qazaqstan Respýblikasynyń keibir zańnamalyq aktilerine volonterlik qyzmet, qaiyrymdylyq, memlekettik áleýmettik tapsyrys jáne úkimettik emes uiymdarǵa arnalǵan granttar máseleleri boiynsha ózgerister men tolyqtyrýlar engizý týraly» Qazaqstan Respýblikasy Zańynyń jobasy týraly» zań jobasynda kózdelgen, ol búgingi kúni QR Májilisi depýtattarynyń qaraýynda jatyr.
«Jumys tobynyń 13 otyrysy jáne zań jobasynyń birinshi oqylymy boldy. Sonymen qatar, 2021 jyldan bastap grant berý protsesiniń ashyqtyǵyn qamtamasyz etý maqsatynda grant alýshylardy aiqyndaý jónindegi saraptamalyq komissiialardyń otyrystary granttyq qarjylandyrý operatorynyń saitynda jáne áleýmettik jelilerinde tikelei efirde kórsetiledi. Sondai-aq, saraptama komissiiasynyń músheleri tikelei efirde kezdeisoq ádispen Sarapshylar tizilimine engizilgen adamdar qatarynan qalyptastyrylady», - delingen resmi jaýapta.
