1 maýsym kúni Premer-Ministrdiń orynbasary Eraly Toǵjanovtyń tóraǵalyǵymen ótken selektorlyq otyrysta ministrlikter, «Atameken» UKP jáne óńirler ákimdikteriniń basshylyǵynyń qatysýymen Qazaqstanda týrizm maýsymyn jandandyrý máseleleri qaraldy, dep habarlaidy primeminister.kz.
Otyrysta Tótenshe jaǵdai kezinde Úkimet tarapynan bul salaǵa múlik salyǵynan jáne eńbekaqy tóleý qorynan salyq tóleý men basqa da tólemderden bosatý turǵysynan memlekettik qoldaý kórsetilgeni atalyp ótti.
Sonymen qatar, zańnamalyq deńgeide týristik salaǵa qosymsha qoldaý kórsetý sharalary qaralyp jatyr:
-
týristik obektilerdi jańadan salý, rekonstrýktsiialaý jáne jabdyqtaý kezinde investitsiia somasynyń 10%-yn óteý jáne preferentsiia berý;
-
ár sheteldik týrist úshin týroperatordyń shyǵyndaryn sýbsidiialaý;
-
áýe kompaniialaryna ishki áýe baǵyttary boiynsha balalardyń jol aqysyn 100% óteý;
-
kásipkerlik sýbektileriniń jol boiyndaǵy nysandardy salý jáne qyzmet kórsetý boiynsha shyǵyndarynyń 25%-yn óteý;
-
týroperatorlar men týragenttikterdiń týristik kólik quraldaryn satyp alý shyǵyndarynyń 25%-yn óteý.
2019-2025 jyldarǵa arnalǵan týristik salany damytý memlekettik baǵdarlamasy aiasynda 44 týristik jobaǵa infraqurylym júrgizý maqsatyna respýblikalyq biýdjetten 51,5 mlrd tg qarajat bólindi. Bul — atalǵan salany qoldaýdyń rekordtyq kórsetkishi deýge bolady.
Keńeste Qazaqstanda týrizm maýsymyn bastaýǵa tolyq daiyndyq jasalǵany habarlandy: týristik nysandardyń jumys algoritmi ázirlendi, jolaýshylardy tasymaldaýdyń avia, temirjol jáne avtobýs marshrýttary iske qosylǵan.
Keńes qorytyndysy boiynsha Premer-Ministrdiń orynbasary E. Toǵjanov óńirlerdiń ákimdikterine týristik obektilerdiń daiyndyǵy týraly aktilerdi berý jumysyn jedeldetýdi, jańa týristik baǵdarlar men tolyqqandy aqparattar jiyntyǵyn jasaýdy, sondai-aq atalǵan salaǵa investitsiia tartý jumysyn kúsheitýdi tapsyrdy.
