Qazaqstanda tuńǵysh ret 10 tomdyq «Dala folklorynyń antologiiasy» shyqty. Kitaptardyń elektrondy, aýdio nusqalary búgingi zamanǵa sai daiyndaldy, dep habarlaidy "Ult aqparat".
«Atalǵan toptama – qazaq folklorynyń barlyq janrynyń tańdaýly úlgilerin jinaqtaǵan, túrli-tústi sýrettermen, etnografiialyq sózdikpen, elektrondy, aýdio nusqasy qamtylǵan, on myń taralymmen jariialanyp otyrǵan elimizdegi tuńǵysh tolymdy antologiia», - dedi M.Áýezov atyndaǵy Ádebiet jáne óner institýtynyń ǵylymi qyzmetkeri Nasihat Mursalimova.
Antologiia – qazirgi kezde tarihshylarǵa, psihologtarǵa, qoǵamtanýshylarǵa, mádeniettanýshylarǵa, ádebietshilerge, tilshilerge, etnograftarǵa, qazaq ómirin zertteitin qoǵamdyq-gýmanitarlyq pánderdiń barlyǵyna, sonymen qatar Qazaqstannyń joǵary oqý oryndary, arnaýly jáne jalpy bilim beretin oqý oryndarynyń oqý quraldary retinde qoldanylady.
«Dala folklorynyń antologiiasy» 1-10 tomdarynyń kitabi nusqasy elimizdiń qoljazba qorlary men buryn jariialanǵan jinaqtardyń, sondai-a, alys-jaqyn shetelderdegi qazaq diasporalarynyń materialdaryn jete saralap, irikteý negizinde daiyndaldy.
Antologiianyń aýdionusqasyn daiyndaý – óte kúrdeli ári jaýapty jumys boldy. Oǵan dástúrli halyq mýzykasyn, án-jyryn jazyp, jariialaýǵa mashyqtanǵan kásibi tájiribesi bar, zamanaýi qondyrǵylarmen jumys istei alatyn bilikti mamandar jumyldyryldy. Jumys barysynda Qurmanǵazy atyndaǵy Ulttyq konservatoriianyń, T.Júrgenov atyndaǵy Óner akademiiasynyń ustaz-oqytýshylary men ónerpazdary, qajettigine qarai óńirlerdegi dástúrli óner mektepterinen de jyrshy-oryndaýshylar, tanymal akter-diktorlar tartyldy. Aýdiojazba men tsifrlandyrý jumystary arnaiy stýdiialarda júzege asyryldy.
Antologiiany baspaǵa daiyndaý jumystaryn M.O. Áýezov atyndaǵy Ádebiet jáne óner institýtynyń ǵalym mamandarynan jasaqtalǵan arnaiy shyǵarmashylyq top júzege asyrdy jáne olardyń jumysyna redaktsiialyq alqa, jobanyń ǵylymi jetekshisi, ǵylymi jáne jaýapty redaktorlar, ǵalym-sarapshylar, sondai-aq institýttyń Ǵylymi keńesi basshylyq jasady.
Nátijesinde «Dala folklory antologiiasynyń» 10 tomy «Brand Book» baspahanasynan jaryq kórdi: 1-tom. «Batyrlar jyry»: 2-tom: «Batyrlar jyry»; 3-tom: Tarihi jyrlar; 4-tom: «Ǵashyqtyq jyrlar»; 5-tom: «Dastandar»; 6-tom. «Ǵuryptyq folklor»; 7-tom. «Prozalyq folklor: Ertegiler»; 8-tom. «Prozalyq folklor: Ańyzdar»; 9-tom. «Halyq óleńderi»; 10-tom. «Ǵibratty folklor. Shaǵyn janrlar».
Qazirgi kúni antologiianyń úsh tomy orys jáne aǵylshyn tilderine aýdarylyp jatyr.
