Qazaqstan Kommýnistik Halyq partiiasynyń E-Party.kz jobasy iske qosyldy. Bul týraly "Ult aqparat" partiianyń baspasóz qyzmetine silteme jasap habarlaidy.
Alǵashqy tsifrlyq partiianyń platformasynda vebinarlar, Telegram-bot arqyly qashyqtyqtan daýys berý múmkindigi, testileýden ótý, ǵylymi jáne áleýmettik zertteýlerge qatysý, atqarylǵan jumystar týraly turaqty esepter jasaý múmkindigi qoljetimdi bolady. Budan bólek, alǵashqy tsifrlyq partiianyń formatynda Telegramm arqyly suraqtar qoiýǵa jáne kún tártibi boiynsha daýys berýge múmkindik bar. Oqýdy aiaqtaǵannan keiin, 2020 jyldyń sońyna qarai aimaqtyq reiting júiesi engiziledi. Jobaǵa tirkelý partiia biletiniń nómirimen júzege asyrylady. Ony JSN sekildi sáikestendirý nómiri dep qarastyrsa da bolady.
Platforma damyǵan saiyn árbir partiialyq óziniń partiialyq qyzmetin, onyń ishinde eriktiler men partiialyq jobalar arqyly jinalǵan bonýstyq upailarynyń reitingin kóre alady.
Belgili bir bonýstar jinaqtalǵannan keiin kitaphanaǵa qol jetimdilik, mamandandyrylǵan partiialyq oqýǵa, onyń ishinde «Citadel.Academy» platformasynyń kásibi kýrstarynda grantpen oqýǵa, sonymen qatar magistr baǵdarlamalaryna daiyndyq, sheteldik taǵylymdamalarǵa qatysý, partiianyń kadrlyq rezervine ený múmkindigi ashylady. Kóshbasshylyq áleýet pen basqarýshylyq qabiletterdiń bolýyna bailanysty profildi testileý nátijeleri boiynsha kadrlyq rezerv úshin jeke damý jospary usynylǵan.
«Qazaqstannyń birinshi tsifrlyq partiiasy jobasy bizge ortalyq pen óńirler arasyndaǵy jedel bailanysty qamtamasyz etýge, aimaqtardan shyqqan talantty jastarǵa áleýmettik liftter qalyptastyrýǵa, sondai-aq Kommýnistik Halyq partiiasynyń kadrlyq rezervin arttyrýǵa múmkindik beredi. E-Party.kz júiesi úsh qaǵidatqa negizdelgen: ádilettilik, qolailylyq jáne anyqtyq. Bul tásil partiialyq kareraǵa yqpal etedi jáne partiia múshelerine úzdiksiz bilim alý arqyly ózderiniń damý múmkindikterin kórýge jol ashady», - deidi QKHP OK Hatshysy, «Halyq kommýnisteri» fraktsiiasynyń jetekshisi, Májilis depýtaty Aiqyn Qońyrov.
Aita ketý kerek, Qazaqstan Kommýnistik Halyq partiiasynyń basshylyǵy tsifrlyq quraldarmen jumys jasaýǵa kóp kóńil bóledi. Mysaly, Jeńis kúni qarsańynda QKHP 1945.kz tsifrlyq estelikter kitabyn iske qosty. Qazaqstandyqtar bul jobany jaqsy qabyldap, joǵary baǵa berdi.
Qazaqstandaǵy alǵashqy tsifrlyq partiia jobasynan basqa, QKHP jyl sońyna deiin barlyq qazaqstandyqtar úshin bilim berý jáne áleýmettik máselelerdi sheshý salasynda birneshe iri jobalardy júzege asyrýdy josparlap otyr.
