Qazaqstanda 17 shilde kúni 5493 adamnyń analizinen koronavirýs infektsiiasy anyqtaldy. Bul týraly indetpen kúres jónindegi vedomstvoaralyq komissiia habarlady.
Aimaqtar boiynsha, kósh basynda Nur-Sultan (1419 naýqas), Almaty (884) jáne Qaraǵandy oblysy (735).
Qalǵan óńirlerdegi táýlik kórsetkishi mynadai:
- Shymkent qalasynda – 370,
- Aqmola oblysynda – 176,
- Aqtóbe oblysynda - 179,
- Almaty oblysynda - 162,
- Atyraý oblysynda - 277,
- Shyǵys Qazaqstan oblysynda - 81.
- Jambyl oblysynda - 57,
- Batys Qazaqstan oblysynda - 266,
- Qostanai oblysynda - 124,
- Qyzylorda oblysynda - 140,
- Mańǵystaý oblysynda - 210,
- Pavlodar oblysynda - 175,
- Soltústik Qazaqstan oblysynda - 95,
- Túrkistan oblysynda - 143.
Elde 14 shildeden beri kún saiyn 5 myńnan astam naýqas tirkelip keledi. Indet bastalǵaly aýrýǵa shaldyqqandardyń jalpy sany 488 905-ke jetip otyr. Bul virýs juqtyrǵany PTR testimen rastalǵandar ǵana. Budan bólek PTR testi teris nátije kórsetip, biraq aýrý belgileri koronavirýstykine uqsaityn pnevmoniia esebi bar. Úkimet bul esepti byltyr 1 tamyzda bastaǵan. Sodan beri pnevmoniianyń bul túrine 58 myńnan astam adam shaldyqqan.
Indettiń kúrt órshýin "delta" variantynyń taraýymen bailanystyrady. Koronavirýstyń bul varianty Qazaqstanda maýsymynyń sońynda tirkelgen. Juqpalyǵy jáne ólim qaýpi joǵary bul variant qazir álemniń júzden astam elinde anyqtalyp, dominant variantqa ainalyp keledi.
Zertteýler qolda bar vaktsinalardyń "delta" variantynan qorǵai alatynyn kórsetip otyr.
17 shildedegi derek boiynsha, Qazaqstanda 4 million 835 myń adam koronavirýs ekpesiniń kemi bir komponentin saldyrǵan. Ekpeni tolyq alǵandar sany 2,7 million.
Elde reseilik "Spýtnik V", qazaqstandyq QazVac, qytailyq Hayat-Vax jáne CoronaVac ekpelerin salady. Keiingi aptada sońǵy ekeýiniń qory sarqylyp qalǵan. Al QazVac ekpesiniń kólemi óndiris qýatynyń álsizdigine bailanysty shekteýli bolyp otyr.
