Qazaqstanda 4 sheteldik investor quny 1,1 mlrd dollar bolatyn jobalardy júzege asyrýda. Bul jaiynda «KAZAKH INVEST» UK» AQ basqarmasynyń tóraǵasy Meiirjan Júsipov málim etti, dep habarlaidy QazAqparat.
«Búgingi tańda KAZAKH INVEST investitsiialyq jobalar pýlyna jalpy quny 72,5 mlrd AQSh dollar bolatyn, 60 myńnan astam turaqty jumys oryndaryn qurýdy kózdeitin 471 joba kiredi. Onyń ishinde 115 joba iske asyryldy jáne investitsiiadan keiingi monitoring satysynda tur. Al 132 joba iske asyrý satysyna shyǵarylsa, 55 joba pysyqtalyp jatyr. Budan basqa 169 jańa investitsiialyq usynys ázirlendi», - dedi ol ortalyq kommýnikatsiialar qyzmetindegi baspasóz máslihatynda.
Onyń atap ótýinshe, iske asyrylyp jatqan jobalardyń ishinde óndeý salasyndaǵy birqatar mańyzdy joba bar.
Onyń qatarynda túriktiń Yildirim holdingi Jambyl oblysynda iske asyryp jatqan quny 325 mln AQSh dollaryn quraityn kaltsiilengen soda shyǵarý zaýytyn, Aqmola oblysynda ispannyń TSK kompaniiasy somasy 110 mln AQSh dollary bolatyn et óndeý kásipornyn ataýǵa bolady.
«Sondai-aq Almaty oblysynda arab investorlary quny 82 mln AQSh dollardy quraityn jemis óndeý zaýyty men qoima salmaq. Al Tehnonikol jáne Eko-Kýltýra kompaniialarynyń reseilik investorlary oqshaýlaǵysh material shyǵaratyn zaýytty jáne elimizde teńdesi joq jalpy aýmaǵy 500 gektar jylyjai keshenin salýdy bastaǵaly otyr. Bul jobalardyń jalpy somasy - 1,1 mlrd AQSh dollary», - dedi Meiirjan Júsipov.
