Monitoring toptary Qazaqstanda tirkelmegen dári-dármektiń 200 túriniń satylyp jatqanyn anyqtady, dep habarlaidy QazAqparat.
«Monitoring toptaryna dári-dármektiń shekti baǵasy men onyń zańsyz satylýyn qadaǵalaý mindeti júktelgen bolatyn. Aimaqtardan kelip túsken málimetke sáikes, monitoringpen 1400-den astam dárihana uiymy qamtylǵan. Jalpy mundai uiymdardyń sany Qazaqstanda – 8 myń», - dedi QR DSM Taýarlar men kórsetiletin qyzmetterdiń sapasy men qaýipsizdigin baqylaý komitetiniń tóraǵasy Timýr Sultanǵaziev OKQ-da ótken baspasóz máslihatynda.
Onyń aitýynsha, óńirlerde elge qajetti dári-dármektiń (keibir jerde 2-3 ese) qymbat baǵamen satý jaǵdaiy áli de tirkelip jatyr.
«Sonymen qatar tirkelmegen dári-dármektiń 200 túriniń satylyp (quny 110 mln teńgelik) jatqany anyqtaldy. Osy jaǵdailar boiynsha QR DSM Taýarlar men kórsetiletin qyzmetterdiń sapasy men qaýipsizdigin baqylaý komitetine qarasty óńirlik departamentterde 65 ákimshilik material bar. Qazirgi tańda jalpy somasy 972 myń teńge bolatyn 12 ákimshilik aiyppul salyndy», - dedi ol.
Timýr Sultanǵazievtyń sózinshe, Densaýlyq saqtaý ministriniń buiryǵyna sáikes Qazaqstanda dári-dármektiń 6 478 túri shekti baǵamen satylady.
«Dári-dármektiń qymbatqa satylyp jatqanyn kórgen azamattar bizdiń komitettiń aýmaqtyq departamentterine habar bere alady. Bailanys quraldary komitettiń saitynda bar», - dedi ol.
