Májilis depýtaty Amanjol Áltai kámeletke tolmaǵan balalar arasynda TikTok jelisine tyiym salýdy usyndy, dep habarlaidy "Ult aqparat".
Halyq qalaýlysy sońǵy ýaqytta jasóspirimder arasynda jantúrshigerlik oqiǵalar jiilep ketkenine qapalandy. Onyń aitýynsha, bul - mektepterde, otbasynda, búgingi qoǵamda bala tárbiesi máselesi aqsap turǵanyn kórsetedi.
"Janymyzdy túrshiktirgen, sanamyzdy silkindirgen Túrkistandaǵy mektep oqýshysynyń ólimi, Qazalydaǵy qatty soqqylardan komaǵa túsken balany aiýandyqpen jabylyp tepkilep jatqan jasóspirimderdiń ozbyr buzaqylyǵy, Óskemendegi top quryp alyp, órimdei qyzdy sheshindirip qoiyp aiaýsyz sabap jatqan tárbiesiz qyzdardyń jiirkenishti áreketteri - búgingi dabyl qaǵyp sóileýimniń negizgi sebebi", - dedi Áltai bas prokýror men Ishki ister ministrine joldaǵan depýtattyq saýalynda.
Osy oraida depýtat el bolashaǵy – tárbieli urpaq ekenin, endeshe urpaq tárbiesine salǵyrt qaramaýǵa mindetti ekenimizdi atap ótti.
"Endi ne isteý kerek? Elimizde izgilikti, qaiyrym, meiirim, qamqorlyqty ulyq tutatyn áleýmettik orta qalyptasýy qajet. Meiirimdilikke, memleketshildikke, ulttyq tálim-tárbiege negizdelgen ulttyq idiologiia qalyptasýǵa tiis", - dep málimdedi májilismen.
Depýtat balalarǵa TikTok-ta otyrýǵa tyiym salýdy usyndy.
"Ishki ister ministrliginiń málimetinshe, 2022 jyly zańǵa qaishy mazmundaǵy 16 myń internet resýrs anyqtalǵan. Ókinishke qarai, telefonǵa telmirgen búgingi urpaq áleýmettik jelilerdiń talǵamsyz, bala sanasyna áser etetin aqparat tasqynynyń tutqynyna ainalyp otyr. Qazaqstanda balalar arasynda shekteýsiz qyzmet etip jatqan TikTok áleýmettik jelisin kámeletke jasqa tolmaǵan jasóspirimder arasynda tyiym salý kerek", - dedi ol.
Sondai-aq Amanjol Áltai jalǵan qorytyndylarmen ahýaldy ýshyqtyrmai, keń kólemdi áleýmettik zertteýler júrgizip, balabaqshadan bastap, joǵary oqý ornyna deiingi tárbie jumystarynyń qanshalyqty tiimdi ekeni, qoǵamdyq-áleýmettik ortanyń qazirgi jaǵdaiy jáne onyń urpaq tárbiesine qalai áser etip jatqany, otbasyndaǵy tárbie máseleleri jan-jaqty baǵalanýy qajet ekenin aitty.
"Áleýmettik zertteýlerdiń nátijesine súiene otyryp, IIM ózderiniń urpaq tárbiesine bailanysty josparlaryna tiimdi ózgerister engizýge tiis. Kámelettik jasqa tolmaǵandardyń isteri jónindegi ýchaskelik politsiia inspektorlarynyń qyzmetin uiymdastyrý qaǵidalaryn qaita qaraý mańyzdy", - dep tolyqtyrdy májilismen.
Budan bólek, depýtattyń pikirinshe, Oqý-aǵartý ministrligi mektepterde muǵalimder oqýshylarǵa tek akademiialyq bilim berip qana qoimai, balalarǵa bergen tárbiesin de tarazylaý mehanizmin engizgen jón. Áleýmettik pedagog, synyp jetekshisi qyzmetin uiymdastyrý qaǵidalaryn qaita qaraýǵa tiis.
