مەجٸلٸس دەپۋتاتى امانجول ەلتاي كەمەلەتكە تولماعان بالالار اراسىندا TikTok جەلٸسٸنە تىيىم سالۋدى ۇسىندى, دەپ حابارلايدى "ۇلت اقپارات".
حالىق قالاۋلىسى سوڭعى ۋاقىتتا جاسٶسپٸرٸمدەر اراسىندا جانتٷرشٸگەرلٸك وقيعالار جيٸلەپ كەتكەنٸنە قاپالاندى. ونىڭ ايتۋىنشا, بۇل - مەكتەپتەردە, وتباسىندا, بٷگٸنگٸ قوعامدا بالا تەربيەسٸ مەسەلەسٸ اقساپ تۇرعانىن كٶرسەتەدٸ.
"جانىمىزدى تٷرشٸكتٸرگەن, سانامىزدى سٸلكٸندٸرگەن تٷركٸستانداعى مەكتەپ وقۋشىسىنىڭ ٶلٸمٸ, قازالىداعى قاتتى سوققىلاردان كوماعا تٷسكەن بالانى ايۋاندىقپەن جابىلىپ تەپكٸلەپ جاتقان جاسٶسپٸرٸمدەردٸڭ وزبىر بۇزاقىلىعى, ٶسكەمەندەگٸ توپ قۇرىپ الىپ, ٶرٸمدەي قىزدى شەشٸندٸرٸپ قويىپ اياۋسىز ساباپ جاتقان تەربيەسٸز قىزداردىڭ جيٸركەنٸشتٸ ەرەكەتتەرٸ - بٷگٸنگٸ دابىل قاعىپ سٶيلەۋٸمنٸڭ نەگٸزگٸ سەبەبٸ", - دەدٸ ەلتاي باس پروكۋرور مەن ٸشكٸ ٸستەر مينيسترٸنە جولداعان دەپۋتاتتىق ساۋالىندا.
وسى ورايدا دەپۋتات ەل بولاشاعى – تەربيەلٸ ۇرپاق ەكەنٸن, ەندەشە ۇرپاق تەربيەسٸنە سالعىرت قاراماۋعا مٸندەتتٸ ەكەنٸمٸزدٸ اتاپ ٶتتٸ.
"ەندٸ نە ٸستەۋ كەرەك? ەلٸمٸزدە ٸزگٸلٸكتٸ, قايىرىم, مەيٸرٸم, قامقورلىقتى ۇلىق تۇتاتىن ەلەۋمەتتٸك ورتا قالىپتاسۋى قاجەت. مەيٸرٸمدٸلٸككە, مەملەكەتشٸلدٸككە, ۇلتتىق تەلٸم-تەربيەگە نەگٸزدەلگەن ۇلتتىق يديولوگييا قالىپتاسۋعا تيٸس", - دەپ مەلٸمدەدٸ مەجٸلٸسمەن.
دەپۋتات بالالارعا TikTok-تا وتىرۋعا تىيىم سالۋدى ۇسىندى.
"ٸشكٸ ٸستەر مينيسترلٸگٸنٸڭ مەلٸمەتٸنشە, 2022 جىلى زاڭعا قايشى مازمۇنداعى 16 مىڭ ينتەرنەت رەسۋرس انىقتالعان. ٶكٸنٸشكە قاراي, تەلەفونعا تەلمٸرگەن بٷگٸنگٸ ۇرپاق ەلەۋمەتتٸك جەلٸلەردٸڭ تالعامسىز, بالا ساناسىنا ەسەر ەتەتٸن اقپارات تاسقىنىنىڭ تۇتقىنىنا اينالىپ وتىر. قازاقستاندا بالالار اراسىندا شەكتەۋسٸز قىزمەت ەتٸپ جاتقان TikTok ەلەۋمەتتٸك جەلٸسٸن كەمەلەتكە جاسقا تولماعان جاسٶسپٸرٸمدەر اراسىندا تىيىم سالۋ كەرەك", - دەدٸ ول.
سونداي-اق امانجول ەلتاي جالعان قورىتىندىلارمەن احۋالدى ۋشىقتىرماي, كەڭ كٶلەمدٸ ەلەۋمەتتٸك زەرتتەۋلەر جٷرگٸزٸپ, بالاباقشادان باستاپ, جوعارى وقۋ ورنىنا دەيٸنگٸ تەربيە جۇمىستارىنىڭ قانشالىقتى تيٸمدٸ ەكەنٸ, قوعامدىق-ەلەۋمەتتٸك ورتانىڭ قازٸرگٸ جاعدايى جەنە ونىڭ ۇرپاق تەربيەسٸنە قالاي ەسەر ەتٸپ جاتقانى, وتباسىنداعى تەربيە مەسەلەلەرٸ جان-جاقتى باعالانۋى قاجەت ەكەنٸن ايتتى.
"ەلەۋمەتتٸك زەرتتەۋلەردٸڭ نەتيجەسٸنە سٷيەنە وتىرىپ, ٸٸم ٶزدەرٸنٸڭ ۇرپاق تەربيەسٸنە بايلانىستى جوسپارلارىنا تيٸمدٸ ٶزگەرٸستەر ەنگٸزۋگە تيٸس. كەمەلەتتٸك جاسقا تولماعانداردىڭ ٸستەرٸ جٶنٸندەگٸ ۋچاسكەلٸك پوليتسييا ينسپەكتورلارىنىڭ قىزمەتٸن ۇيىمداستىرۋ قاعيدالارىن قايتا قاراۋ ماڭىزدى", - دەپ تولىقتىردى مەجٸلٸسمەن.
بۇدان بٶلەك, دەپۋتاتتىڭ پٸكٸرٸنشە, وقۋ-اعارتۋ مينيسترلٸگٸ مەكتەپتەردە مۇعالٸمدەر وقۋشىلارعا تەك اكادەمييالىق بٸلٸم بەرٸپ قانا قويماي, بالالارعا بەرگەن تەربيەسٸن دە تارازىلاۋ مەحانيزمٸن ەنگٸزگەن جٶن. ەلەۋمەتتٸك پەداگوگ, سىنىپ جەتەكشٸسٸ قىزمەتٸن ۇيىمداستىرۋ قاعيدالارىن قايتا قاراۋعا تيٸس.
