Mádeniet jáne aqparat vitse-ministri Qanat Ysqaqov Senat kýlýarynda "Qazaqstanda TikTok-ty buǵattaý josparlanyp otyr ma?" degen suraqqa jaýap berdi.
Mundai suraq mádeniet jáne aqparat ministri Aida Balaevanyń "Ulttyq qaýipsizdikke qaýip tóndiretin jeliler buǵattalady" dep pikir bildirgeninen keiin týyndaǵan.
Vitse-ministr vedomstvo basshysynyń sózin túsindirip berdi. Onyń aitýynsha, ministrlik jelini buǵattaýdy josparlap otyrǵan joq.
"Naqtylyqqa kóshsek, ministrge suraq TikTok-qa qatysty qoiyldy. Zańnamaǵa sáikes emes kontentti TikTok ózi joiyp otyrady. Olardyń shekteý boiynsha algoritmi jumys isteidi. Al ministrlikte qazirgi ýaqytta buǵattaý máselesi qarastyrylyp jatqan joq. Biraq zańnamany saqtaý jónindegi talaptar oryndalmaǵan jaǵdaida, qoljetimdilikti shekteýge bailanysty sharalar kózdelgen", - dep atap ótti vitse-ministr Qanat Ysqaqov.
Onyń aitýynsha, Mádeniet jáne aqparat ministrligi TikTok-pen qoian-qoltyq jumys júrgizip jatyr. Sondai-aq ol ulttyq qaýipsizdikke qaýip tóndirý dep qandai jaǵdaida jeli buǵattalatynyn túsindirdi.
"Ulttyq qaýipsizdik týraly zańnamada bári anyq kórsetilgen. Aýmaqtyq tutastyqty buzatyn, memlekettik birlikti buzatyn, qoǵamǵa qaýip tóndiretin (kontent - avt. eskertpesi)", - dep atap ótti Ysqaqov.
