QR Ishki ister ministrligi men BUU-nyń arnaiy basqarmasy qylmystyq atqarý júiesine qarasty mekemelerde ekstremizmge qarsy kúres jónindegi jospardy rásimdedi, dep xabarlaidy QazAqparat tilshisi.
Atalǵan jospar ekstremizm men terrorizm úshin sottalǵandarmen jumysty uiymdastyrý jáne olardyń arasynda radikalizatsiianyń aldyn alý týraly birlesken jahandyq baǵdarlamasy aiasynda ázirlendi. Baǵdarlamanyń jalpy biýdjeti - 9,1 million AQSh dollary. Ony Eýropalyq odaq (4,7 mln), Niderlandy Koroldigi (1,4 mln) jáne BUU Terrorizmge qarsy basqarmasy (3 mln) usynyp otyr. Baǵdarlama benefitsiarlary - Qazaqstan, Týnis jáne Ýganda, iaǵni osy úsh memlekette birlesken jospardy iske asyrý josparlanǵan.
QR IIM Qylmystyq atqarý júiesi komitetiniń tóraǵasy Azamat Bazylbekovtiń aitýynsha, baǵdarlamany BUU Esirtki jáne qylmys jónindegi basqarmasymen birlese ázirlendi. Sonyń negizinde qylmystyq atqarý júiesiniń qyzmetkerleri arnaiy daiyndyqtan ótedi.
"Osy baǵdarlamanyń arqasynda biz óz mamandarymyzdyń kásibi biliktiligin arttyra alamyz degen senim bar. Sebebi dál osy qyzmetkerler ekstremizm men terrorizm úshin sottalǵandarmen jumys isteidi, ondai azamattardyń qoǵam ómirine aralasyp ketýine kómektesip otyrady. Árine, sheteldik tájiribeniń mańyzy zor. Óitkeni baǵdarlamaǵa xalyqaralyq sarapshylar da qatysady. Osynyń bári jaqsy nátije beredi dep senemiz", - dedi A.Bazylbekov jýrnalisterge bergen suxbatynda.
Onyń sózine qaraǵanda, búginde Qazsqtanda 500-den astam adam ekstremizm men terrorizm úshin jazany ótep júr. Olardyń úshten birin radikalizatsiiadan shyǵarý qajet. "Qazirgi kezde biz naqty mekemeni anyqtap jatyrmyz. Bálkim, erler men áielder otyratyn eki mekeme bolady. Sebebi atalǵan baǵdarlama ázirshe pilottyq rejimde qolǵa alynady. Tájiribeni jinaqtaǵannan keiin ony barlyq mekemelerge taratamyz", - dep atap kórsetti A.Bazylbekov.
Aita keteiik, baǵdarlama aiasynda IIM Qostanaidaǵy akademiiasy negizinde arnaiy ortalyq ashylady. Sol jerde qylmystyq atqarý júiesiniń qyzmetkerleri teologiialyq ońaltý negizderin meńgeredi. Budan bólek, arnaiy áleýmettik zertteýler júrgiziledi. Ekstremizm men terrorizm úshin sottalǵandardy qoǵam ómirine qanshalyqty beiimdelip jatqanyna da baǵa beriledi.
