QazMÚBB ýniversiteti óz qyzmetin toqtatty. Qazaq meditsinalyq úzdiksiz bilim berý ýniversitetiniń barlyq stýdenti basqa meditsinalyq joǵary oqý oryndaryna aýystyryldy, dep habarlaidy "Ult aqparat" Bilim jáne ǵylym ministrligine silteme jasap.
Vedomstvo baspasóz qyzmetiniń málimetinshe, aýystyrý sońǵy eki aida júzege asyryldy. Endi túlekter oqýyn jalǵastyryp, joǵary bilim týraly diplom alady. Esterińizge sala keteiik, osy jyldyń sáýir aiynda Qazaq meditsinalyq úzdiksiz bilim berý ýniversitetin bas litsenziiasynan aiyrý týraly sot sheshimi zańdy kúshine engen.
«QazMÚBBÝ-da 3 500-ge jýyq adam bilim aldy. Stýdentterdiń basym bóligi Almaty qalasynyń meditsinalyq joǵary oqý oryndaryna aýysty. Keibir stýdentter oqýyn Nur-Sultan, Qaraǵandy, Semei, Aqtóbe, Shymkent jáne Túrkistan qalalaryndaǵy meditsinalyq JOO-larda jalǵastyrady. Aýysý barysynda qabyldaýshy joǵary oqý oryndaryna stýdentterdi qabyldaý jáne oqý nátijelerin baǵalaý kezinde QazMÚBBÝ tarapynan jiberilgen buzýshylyqtardy joiýǵa týra keldi. Aýystyrylǵan 111 stýdenttiń jeke qujattarynda talap etiletin attestattar men olarǵa qosymshalar bolmady. Keibir stýdentterdiń UBT-daǵy sertifikattary da bolǵan joq», - dedi QR BǴM Bilim jáne ǵylym salasyndaǵy sapany qamtamasyz etý komiteti tóraǵasynyń orynbasary Gúljan Jarasova.
Sondai-aq stýdentterdi basqa joǵary oqý oryndaryna aýystyrý kezinde keibir magistranttardyń prerekvizitterden ótpei oqyǵany anyqtaldy. Sonymen qatar stýdentter qabyldaý kezinde mindetti testileýdiń keibir elementterin tapsyrmaǵan.
QazMÚBBÝ bitirýshi kýrs stýdentteri memlekettik standarttyń mindetti pánderin tolyq kólemde oqymaǵan. Birqatar negizgi pánder múldem igerilmegen. Máselen, «Farmatsiia» qysqartylǵan baǵdarlamasy boiynsha oqyǵan stýdentter tiisti 120 kredittiń ornyna tek 78-in ǵana oqyǵan. «QazMÚBBÝ jibergen osy jáne basqa da buzýshylyqtar stýdentterdi basqa meditsinalyq joǵary oqý oryndaryna aýystyrý protsesin tejedi. Búgingi tańda bul máseleler sheshilip, bilim alýshylar basqa ýniversitetterde oqýyn jalǵastyrdy. Qabyldaýshy joǵary oqý oryndary bilim alýshylarǵa akademiialyq aiyrmashylyqty igerýge múmkindik berdi. Sondai-aq olar stýdentterge jetispeitin qujattardy qalpyna keltirýge, oqýdaǵy olqylyqtardyń ornyn toltyrýǵa jáne biylǵy oqý jylyn ýaqytyly aiaqtaýǵa kómektesedi», - dedi Gúljan Jarasova.
