Qazaqstanda 18 tamyz kúni 7337 adamnyń analizinen koronavirýs anyqtaldy (KVI+), sodan bir kún buryn 421 adamǵa "kovidtektes pnevmoniia" (KVI-) diagnozy qoiyldy. Koronavirýstan bir kúnde 139 adam kóz jumdy. Bul týraly densaýlyq saqtaý ministrligi habarlady.
KVI+ naýqastary arasynda Almatyda ádettegidei 1,5 myńnan astam naýqas tirkeldi. Qalada shildeniń sońynan beri kún saiyn osy shamada jańa naýqas anyqtalyp keledi.
5 tamyzdan beri táýlik saiyn myńnan astam naýqas shyǵatyn Qaraǵandy oblysynda 977 naýqas tirkelgen. Nur-Sultanda PTR taldaýy 824 adamnyń Covid juqtyrǵanyn kórsetken.
Bul sanat boiynsha, indet bastalǵaly 715 716 naýqas, 7335 ólim tirkelgen. Bilik qaitys bolǵandar tizimine koronavirýs juqtyrǵany rastalǵan, biraq "ózge aýrýdan qaitys boldy" degen eki myńnan astam adamdy qospai otyr.
"Kovidtektes pnevmoniia" boiynsha, kósh basynda – Shymkent qalasy. Onda bul diagnoz 71 adamǵa qoiylǵan. Odan keiingi oryndarda 67 naýqaspen Jambyl oblysy jáne 54 naýqaspen Almaty oblysy tur. Qazaqstan biligi "kovidtektes pnevmoniia" esebin byltyr 1 tamyzdan beri júrgizip keledi. Sodan beri bul aýrýmen 66 802 adam tirkelgen, onyń 4129-y qaitys bolǵan.
Eki esepti qosqanda, elde shildeniń sońynan beri kún saiyn 7-8 myń naýqas tirkelip otyr. Mamandar muny álemge jyldam taraǵan "delta" variantymen bailanystyrady. Alǵash ret Úndistanda anyqtalǵan bul variant Qazaqstanda maýsymnyń sońynda tirkelgen. "Delta" koronavirýstyń bastapqy varianttaryna qaraǵanda juqpalyraq jáne adamdy aýyr halge jyldam túsiredi.
Álemdik densaýlyq saqtaý uiymdary qolda bar Covid vaktsinalarynyń bul varianttan qorǵaitynyn aitady. Ekpe salý naýqanyn 1 aqpanda bastaǵan Qazaqstanda 4 million 867 myń adam vaktsinany tolyq alǵan. Budan bólek 1,3 millionam astam adam vaktsinanyń ekinshi komponentin kútip otyr.
Sondai-aq, Qazaqstanda 19 tamyzdaǵy málimet boiynsha, 121 113 adam koronavirýs infektsiiasynan (–115 764 + jáne 5 349 KVI-) emdelip jatyr.
Olardyń ishinde 30 286 patsient statsionarda, 90 827 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
• 1 896 adamnyń jaǵdaiy aýyr,
• 540 patsienttiń jaǵdaiy óte aýyr,
• 265 naýqas jasandy tynys alý apparatynda jatyr.
