Qazaqstandyqtardyń tabysyn arttyrýǵa arnalǵan arnaiy baǵdarlama ázirlenip jatyr. Bul týraly QR Premer-Ministri Álihan Smaiylov málim etti, dep habarlaidy QazAqparat agenttigi.
«Kásipkerlikti damytý Úkimettiń 2022 jylǵa arnalǵan is-qimyl baǵdarlamasynda aiqyndalǵan jańa ekonomikalyq baǵyttyń biri. Josparda Memleket basshysynyń tapsyrmasy boiynsha bizneske qatysty karantindik sharany jeńildetýdi qaita qarady. Sondai-aq tarifterdi, onyń ishinde kólik jáne logistika salasyndaǵy tabiǵi monopolisterdiń qyzmetterine tómendetý sharasy qabyldandy», - dedi Álihan Smaiylov elordada ótip jatqan «Atameken» ulttyq kásipkerler palatasynyń kezekten tys IH sezinde.
Onyń aitýynsha, qazirgi ýaqytta Úkimet qańtar aiyndaǵy oqiǵalar barysynda shaǵyn jáne orta bizneske kelgen múliktik ziiandy qalpyna keltirý jumystary júrip jatyr.
«Halyqtyń tabysyn arttyrýdyń arnaiy baǵdarlamasy ázirlenýde. Onyń ishinde jumyspen qamtý isin jalǵastyrý, indýstriialyq jáne aýyl sharýashylyǵy jobalaryn iske asyrý jospary bar. Sonymen qatar óndiristi tehnologiialyq jańǵyrtý, halyq kirisindegi teńgerimsizdikti teńestirý jáne adami kapitaldy damytý jónindegi sharalar josparlanyp otyr. Halyqtyń tabysyn arttyrý úshin de, biznesti tabysty júrgizý úshin de infliatsiia deńgeiin tómendetý mańyzdy», - deidi ol.
Sondai-aq, Úkimet basshysy jahandyq pandemiiaǵa bailanysty álem elderinde infliatsiianyń ósýi saqtalyp turǵanyn aitty.
