Qazaqstanda sybailas jemqorlyqtyń oryn alýy jaily habarlaǵan azamattarǵa beriletin syiaqy mólsheri artty. Bul týraly QR Sybailas jemqorlyqqa qarsy is-qimyl agenttiginiń elordalyq departamentindegi preventsiia jáne parasattylyq basqarmasynyń basshysy Marat Hairýllin málim etti, dep habarlaidy QazAqparat.
«Sybailas jemqorlyq quqyq buzýshylyq faktisi týraly habarlaǵan nemese sybailas jemqorlyqqa qarsy is-qimylda ózge de jolmen járdemdesetin adamdarǵa birjolǵy aqshalai syiaqy nysanynda júzege asyrylatyn kótermeleý belgilenedi. Qaǵidalarmen reglamenttelgen kótermeleý sybailas jemqorlyqqa múldem tózbeýshilikti qalyptastyrý jáne azamattyq qoǵamdy osy qaýipti áleýmettik qubylyspen kúreske tartý boiynsha pármendi yntalandyrý tetigi bolyp sanalady», - dedi Marat Hairýllin elordadaǵy Antikor ortalyǵy alańynda onlain ótken baspasóz máslihatynda.
Onyń aitýynsha, sybailas jemqorlyqqa qatysty habarlamaǵa beriletin syiaqy erejesine halyqaralyq tájiribege súiene otyryp ózgerister engizildi.
«Ekonomikalyq yntymaqtastyq jáne damý uiymy elderiniń tájiribesi boiynsha (Germaniia, Ulybritaniia, AQSh) syiaqy somasy saralanǵan somaǵa ainaldy. Endi para nemese keltirilgen zalal somasy 1 myń AEK-ten (2 mln 917 myń teńge) aspaityn sybailas jemqorlyq quqyq buzýshylyq týraly habarlama úshin syiaqy (qylmystyń aýyrlyǵyna bailanysty) 30-dan 100 AEK-ke deiingi somany quraidy. Kórsetilgen somadan artyq – syiaqy kólemi 10% - dy quraidy, biraq 4 myń AEK-ten aspaidy (11 mln 668 myń teńge) Buryn syiaqyny kótermeleýdiń eń joǵary mólsheri 100 ailyq eseptik kórsetkishten (291 myń 700 teńge) aspaityn», - deidi ol.
Sondai-aq, basqarma basshysy atalǵan syiaqynyń respýblikalyq biýdjet qarajaty esebinen júrgiziletinin aitty.
