Qazaqstanda bilikti mamandar tapshylyǵyn azaitý maqsatynda sheteldik joǵary bilikti kadrlardy jumysqa ornalastyrýdyń jeńildetilgen tártibi qoldanylyp jatyr, dep habarlaidy Ult.kz.
Qazaqstan Respýblikasy Eńbek jáne halyqty áleýmettik qorǵaý ministrligi málimetinshe, arnaiy tizimge suranysqa ie 50-den astam mamandyq engizilgen. Olardyń qatarynda aqparattyq tehnologiialar, densaýlyq saqtaý, injeneriia jáne kreativti indýstriia salalarynyń mamandary bar.
Atalǵan tizimge engen sheteldik mamandarǵa Qazaqstanda turaqty turýǵa ruqsat alý múmkindigi beriledi. Bul tetik el ekonomikasynyń basym baǵyttaryna qajetti kadrlardy tartýǵa baǵyttalǵan.
Enbek.kz portalynyń deregine sáikes, elde meditsina salasynda kadr tapshylyǵy áli de ózekti bolyp otyr.
Atap aitqanda:
- – «akýsher-ginekolog» mamandyǵy boiynsha 469 bos jumys ornyna nebári 100 túiindeme;
– «pediatr» boiynsha 448 vakansiiaǵa 139 túiindeme;
– «anesteziolog-reanimatolog» mamandyǵyna 300 bos orynǵa 75 túiindeme ǵana tirkelgen.
Sondai-aq onkolog, neonatolog jáne endokrinolog mamandaryna da suranys joǵary.
Aqparattyq tehnologiialar salasynda da kadr jetispeýshiligi baiqalady. Máselen, qoldanbaly baǵdarlamashylarǵa 509 bos jumys orny, grafikalyq dizainerlerge 355 vakansiia ashylǵan.
Ministrlik málimetine sáikes, suranysqa ie mamandyqtar boiynsha 45 myńnan astam eńbek sharty jasalǵan. Onyń ishinde baǵdarlamalyq qamtamasyz etý ázirleýshileri – shamamen 8 myń, akýsher-ginekologtar – 4,6 myń, pediatrlar – 4,1 myń jáne qoldanbaly baǵdarlamashylar – 3,5 myń eńbek shartyn quraidy.
Sonymen qatar sheteldik jumyskerlermen 55 eńbek sharty rásimdelgen. Olardyń basym bóligi avtomattandyrý injenerleri retinde jumysqa qabyldanǵan.
Mamandardyń aitýynsha, ishki eńbek naryǵy kóptegen suranysqa ie mamandyqtar boiynsha qajettilikti ótep otyrǵanymen, densaýlyq saqtaý salasyndaǵy kadr tapshylyǵy máselesi áli de saqtalyp otyr.
