Búgin QR Úkimeti alańynda ótken baspasóz konferentsiiasynda QR ekologiia, geologiia jáne tabiǵi resýrstar vitse-ministri Sergei Gromov sý tasqyny kezeńi qarsańynda elimizde barlyq gidrotehnikalyq qurylystarǵa tekserý júrgizý týraly aityp berdi, dep habarlaidy "Ult aqparat" primeminister.kz saityna silteme jasap.
Aldaǵy sý tasqyny maýsymyna daiyndyq maqsatynda Sý resýrstary komitetiniń basseindik inspektsiialary TJ organdarynyń, jergilikti atqarýshy organdardyń jáne «Qazsýshar» RMK ókilderimen birlesip gidrotehnikalyq qurylystarǵa kózben sholyp tekserý júrgizdi. Inspektsiialar qajetti is-sharalardy ótkizý týraly uiǵarymdar men usynymdar berdi.
«Aldyn ala gidrotehnikalyq boljamǵa sáikes, biyl qar qory mol bolǵandyqtan, ortasha norma jekelegen jerlerde 40-100%-ǵa joǵary 7 óńir anyqtaldy, atap aitsaq: Nur-Sultan qalasy, ShQO, SQO, Qaraǵandy, Pavlodar, Aqmola jáne Qostanai oblystary. Bizde ministrlikte sý tasqynyna qarsy komissiia qurylyp, tiisti josparlar ázirlendi. Úlken sý tasqyny oryn alǵan jaǵdaida bizdiń sý qoimalarymyz tranzittik tártipte jumys isteitin bolady», — dedi S. Gromov.
Onyń aitýynsha, sý qoimalaryna monitoring táýlik boiy júrgiziledi.
«Aldaǵy sý tasqyny maýsymyna daiyndyq maqsatynda biz tótenshe jaǵdailardyń týyndaý qaýpi asa joǵary jerler kórsetilgen karta jasadyq. Jaýǵan qardy eskere otyryp, ózen arnalaryn tazalaý jumystaryn júrgizý qajet. Barlyǵy baqylaýǵa alynǵan, bógetterdi shaiyp ketý qaýpi ázirge baiqalmaidy», — dedi vitse-ministr.
Búginde iesiz GTQ boiynsha másele ministrliktiń erekshe baqylaýynda.
«2017 jyldan bastap jergilikti atqarýshy organdar aýqymdy jumystar atqardy, iesiz qalǵan nysandar sany 49-dan 10-ǵa deiin azaidy, degenmen bul jumysty áli de jalǵastyrý qajet», — dedi ol.
Sonymen qatar ministrdiń orynbasarynyń baǵalaýynsha, atalǵan iesiz sý qoimalary búginde esh qaýip tóndirmeidi.
Atap ótken jón, respýblika boiynsha 463 gidrotehnikalyq qurylysty jóndeý qajet. Osy jyldyń sý tasqyny kezeńine daiyndyq maqsatynda 2019 jyldyń kúzinde óńirler 163 shaqyrym qorǵanys bógetterin salý jáne jóndeý, jaǵalaýdy bekitý, túbin tereńdetý, 330 shaqyrym sý tasqyny qaýpi bar ózen arnalaryn túzetý, 116 shaqyrym sý burý arnalaryn ornatý, 2006 shaqyrym arnany, aryqtardy, avtomobil jáne temir jol kópirleri astyndaǵy 10314 birlik sý ótkizý qurylystaryn tazalaý jumystaryn júrgizdi.
Sý tasqynynyń aldyn alý jáne saldaryn joiý úshin 13,5 myń tonna janar-jaǵar mai, 152,6 myń tonna inertti materialdar, 840 myń qum salynǵan qap jáne 47 tonna jarylǵysh zattar qory daiyndaldy, eldi mekenderden 8,8 mln tekshe metrden astam qar shyǵaryldy. Evakýatsiialanǵan halyqty qabyldaityn 1707 pýnkt daiyndaldy, evakýatsiialaý baǵyttary jańartyldy, jalpy sany 9 myń adamnan jáne 1730 birlik tehnikadan turatyn IIM kúshteri men quraldary daiyndaldy.
