Sý resýrstaryn basqarý jónindegi ulttyq joba ázirlenip jatyr. Bul jaiynda Májilis depýtattarynyń saýalyna QR Premer-Ministriniń orynbasary Roman Skliardyń jaýabynda aitylǵan, dep habarlaidy "Ult aqparat".
«Qazirgi ýaqytta sý resýrstaryn basqarý jónindegi ulttyq joba ázirlenýde. Onda sý qoryn qorǵaý jónindegi is-sharalar retinde ózdiginen aǵyp jatqan iesiz gidrogeologiialyq uńǵymalardy joiý jónindegi jumystardy kózdeý josparlanýda. Ulttyq jobany iske asyrý úshin jalpy somasy 66 193,0 myń teńgege 151 iesiz ózdiginen tógiletin gidrogeologiialyq uńǵymalardy joiý boiynsha jobalaý-smetalyq qujattamany ázirleýge 2021 jylǵa qosymsha biýdjettik ótinim berildi», - delingen Úkimet basshysynyń orynbasarynyń resmi jaýabynda.
Vitse-premerdiń atap ótýinshe, atalǵan shyǵystar respýblikalyq biýdjet komissiiasynyń sheshimimen qoldaý tapqan.
«Osylaisha, 2021-2025 jyldar kezeńinde jer asty sýlarynyń tabiǵi resýrstarynyń ysyrabyn, jer qoinaýy men qorshaǵan ortanyń lastanýyn boldyrmaý maqsatynda 600-den astam iesiz, ózdiginen tógiletin, joǵary debitti uńǵymalar men radionýklidteri joǵary uńǵymalardy joiý josparlanyp otyr», - dep tolyqtyrdy Roman Skliar depýtat saýalyndaǵy jaýabynda.
