Tokiodaǵy Olimpiadada Qazaqstan sportshylarynyń nátijesine tiisti memlekettik qurylymdar taldaý jasaidy, dep habarlaidy "Ult aqparat".
«Aldaǵy aptalarda QR Ulttyq Olimpiada komiteti respýblikalyq federatsiialarmen ári Mádeniet jáne sport ministrligimen birlese Olimpiadada ulttyq qurama komandalardyń nátijesi men daiyndyǵyna qatysty taldaý jumysyn júrgizedi. 10 qyrkúiekke deiin sport federatsiialary Olimpiada oiyndaryna qatysý boiynsha tyńǵylyqty esepti usynady. Onda sportshylardyń sátti nemese nátijesiz óner kórsetýi máselesine qatysty taldaý bolady. Qyrkúiektiń sońyna qarai biz sońǵy qorytyndyny shyǵaramyz. Osydan keiin qatelikterdi túzetý men kelesi olimpiadalyq tsiklge daiyndyq jumystary bastalady», - dedi UOK Bas hatshysy Andrei Kriýkov Ortalyq kommýnikatsiialar qyzmetinde.
Onyń paiymynsha, Tokioǵa jaqsy komanda bardy.
«Nátijege qaramastan, bizdiń sportshylardyń árqaisysymen maqtan tutamyz. Olar pandemiia jaǵdaiynda daiyndyqtyń qiyn kezeńin eńserdi. Olarǵa deiin eshkim de osyndai ahýalǵa tap bolmady», - dedi Andrei Kriýkov.
Al Qazaqstan boks federatsiiasynyń bapkerlik máseleler jónindegi vitse-prezidenti, memlekettik jattyqtyrýshy Baqtiiar Artaev boksshylar komandasynyń nátijesin "sátsizdik" dep atady.
"Ár nárseni óz atymen ataityn ýaqyt keldi ǵoi, "sátsizdik" dep aitqan óte oryndy shyǵar. Óitkeni óte tómen nátije boldy. Qazir kóshege shyqsaq, bári boks ahýalyn aitady. Sondyqtan biz úshin óte nashar kórsetkish, eshkimdi aqtamaimyz, ózimizdi de aqtamaimyz", - dep atap kórsetti Artaev.
Onyń aitýynsha, aldaǵy ýaqytta boksshylardy daiyndaý júiesi ózgerýi múmkin. Sebebi Qazaqstanda áli kúnge deiin keńestik júieni qoldanylady.
"Biz sovet úkimetiniń daiyndyǵynan áli kúnge deiin aryla almai kele jatyrmyz. Kúnine úsh mezgil daiyndyqtyń ózi balalarǵa óte aýyr. Sondyqtan daiyndyq kezeńi ózgerýi múmkin. Bapkerler máselesin qarastyramyz jáne boksshylar ratsionyn da ózgertetin shyǵarmyz", - dedi Artaev.
Osy oraida jýrnalister áleýmettik jelide boksshylardyń bas bapkeri Ǵalymbek Kenjebaevty jii synǵa alyp jatqanyn eske saldy. Tipti, ony otstavkaǵa jiberý kerek deidi. Artaev osy máselege qatysty sheshim bar ekenin jetkizdi.
"Bul suraqqa jaýap daiyn. Shamaly sabyr etseńizder, bul suraqtardyń bárine is júzinde jaýap beremiz. Bir apta kóleminde shamaly ýaqyt berińizder", - deidi Artaev.
Aita keteri, Tokio Olimpiadasyna 97 qazaqstandyq sportshy barǵan. Olardyń ishinde 8 adam ǵana júldege ilindi. Barlyǵy qola medalmen elge qaitty. Al boksshylar eki qolany qanaǵat tutty.
