Sońǵy úsh jylda 22,1 mlrd teńgege veterinariialyq preparattar satyp alyndy, onyń 44,7 paiyzy otandyq ónimge tiesili. Bul týraly Májilistegi Úkimet saǵatynda depýtat Erlan Barlybaev aitty, dep habarlaidy QazAqparat.
«Veterinarlyq inspektsiianyń qyzmetin sapaly jańa deńgeige kóterý kerek. Bir jaǵynan onyń epizootiialyq jaǵdaiǵa, zań talaptarynyń oryndalý jaǵdaiyna jaýapkershiligin arttyrý, ekinshi jaǵynan ony qajetti materialdyq – tehnikalyq resýrstarmen jáne arnaiy kólik quraldarymen jabdyqtaý qajet. Qazirgi ýaqytta Qazaqstanda 2010-2012 jyldary paidalanýǵa berilgen quny 14,6 mlrd teńgeni quraityn 114 veterinariialyq zerthanalr jumys isteidi. Olardyń jumysyna erekshe nazar aýdaryp, múmkindikterin barynsha paidalaný qajet», - dedi Barlybaev.
Onyń aitýynsha, mal aýrýlarynyń aldyn alý, diagnostikalaý jáne emdeýdiń zamanaýi ádisterine belsendi túrde kóshý kerek. Soǵan sáikes veterinariia júiesin qajetti normativtik jáne materialdyq-tehnikalyq bazalarmen jabdyqtaý qajet. Sonymen qatar, otandyq veterinariiada qoldanylatyn vaktsinalar men preparattardyń sapasyn erekshe baqylaýǵa alǵan jón.
«Tek sońǵy 3 jyldyń ishinde Qazaqstan Respýblikasy Resei Federatsiiasynan 7,8 mlrd teńgege aýsylǵa qarsy vaktsinalardyń 110,5 mln dozasyn satyp aldy, bul barlyq satyp alynǵan vaktsinalardyń 35% paiyzyn quraidy. Iri qara maldyń nodýliarlyq dermatitine qarsy vaktsinanyń quny 2019 jylmen salystyrǵanda 43,5% paiyzǵa artyp, 9 mln doza 2,1 mlrd teńgeni qurady. Jalpy, sońǵy úsh jylda 22,1 mlrd teńgege veterinariialyq preparattar satyp alyndy, onyń 44,7 paiyzy otandyq ónimge tiesili. Osyǵan bailanysty, otandyq veterinariialyq preparattardyń sapasy men qoljetimdiligin arttyrý úshin qazaqstandyq veterinariialyq preparattardy óndirýshilermen, onyń ishinde memlekettik tapsyrys arqyly uzaq merzimdi kelisimsharttar jasaýdy basym túrde júzege asyrý usynylady», - dedi depýtat.
