Elimizde ótken apta ishinde 12 adam óltirý qylmysy ashyldy. Bul týraly QR Ishki ister ministrliginiń ókili Shuǵyla Berikqyzy málim etti, dep habarlaidy "Ult aqparat"..
«Ótken aptada el aýmaǵynda 3226 qylmys jasaldy, onyń 2225-i táýlik ishinde ashyldy. Politsiia qyzmetkerleri «izin sýytpai» 12 kisi óltirýdi, 8 ólimge ákep soqqan densaýlyqqa qasaqana aýyr ziian keltirýdi, 2 qaraqshylyq, 44 tonaý jáne 466 bóten múlikti urlaý qylmysyn ashty», - dedi Sh. Berikqyzy IIM-de onlain ótken baspasóz máslihatynda.
Odan bólek, baspasóz máslihatynda eldegi turmystyq zorlyq-zombylyq máselesi kóterildi.
Ministrlik ókiliniń aitýynsha, atalǵan problemaǵa qatysty zańnama 2009 jyly qabyldanyp, sodan beri oǵan 12 márte tolyqtyrý men ózgertýler engizildi.
Óz kezeginde QR IIM Ákimshilik politsiia komiteti tóraǵasynyń orynbasary Aleksei Miliýk elimizde turmystyq zorlyq-zombylyqqa qatysty jaýapkershiliktiń kúsheitiletinin aitty.
«Qoldanystaǵy zańnamaǵa sáikes, quqyq qorǵaý organdary ákimshilik isti zardap shegýshiniń ótinishinsiz de júrgize alady. Degenmen, otbasylyq zorlyq-zombylyq kórgen áiel, iaǵni zardap shegýshi, kóp jaǵdaida kúieýine psihologiialyq, qarjylyq jaǵynan táýeldi bolǵandyqtan máseleni ýshyqtyrǵysy kelmei, tatýlasýǵa kelisimin beredi. Ótken jyly bizge el boiynsha turmystyq zorlyq-zombylyq qurbanymyn dep jazylǵan 190 myń ótinish kelip tústi. Sonyń tórtten biri ǵana sotqa deiingi tergeýge jiberildi. Jalpy, zorlyq-zombylyqqa qatysty ákimshilik is júrgizýdiń 60 paiyzy eki jaqtyń tatýlasýyna bailanysty toqtaidy. Osy oraida biz turmystyq zorlyq-zombylyq oryn alǵan jaǵdaida eki jaqtyń tatýlasý protsesin qaita qaraýdy qolǵa alyp jatyrmyz. Iaǵni, aldaǵy ýaqytta kúieýi tarapynan áieline qol kóterý qaitalanǵan jaǵdaida tatýlasýǵa ruqsat bermeý josparda bar», - deidi ol.
