Birinshi naýryz, iaǵni Alǵys aitý kúni «Shyn Júrekten»: Jurekten.kz áleýmettik, volonterlik jobasy bastaldy, dep habarlaidy "Ult aqparat".
Elimizdiń turǵyndary alǵys bildirgisi keletin adamdaryna «raqmetin» jetkize alady. Ol úshin saitqa kirip, alǵys jiberý jetkilikti. Jyly sózderdi kez kelgen adamǵa: ata-ana, alǵashqy muǵalim, dáriger nemese beitanys adamdarǵa da arnaýǵa bolady.
Joba jetekshisi Black & White Production kompaniiasynyń atqarýshy prodiýseri Adina Hamardyń aitýynsha, «Raqmet» dep aitý qiyn nárse emes, ony estigen adamnyń da qýanyp qalatyny sózsiz.
«Biz qazir pandemiia týdyrǵan, qiyndyqtar men shekteýler áser etip jatqan erekshe ýaqytty bastan ótkerip jatyrmyz. Bizdiń jobanyń maqsaty – adamdardy osyndai kúrdeli kezeńde bireýge shyn júrekten alǵys aityp, rizashylyq bildirýge shaqyrý», - deidi prodiýser.
Joba avtorlary qazir biz jaqsy jańalyqtardan góri jaǵymsyz jańalyqtardy jii estimiz degendi alǵa tartady. Bizdiń ainalamyzda kóbinese yzaly jáne qatygez adamdar ómir súretin siiaqty. Biraq meiirimdilik, jaqsylyq jasaý, mahabbat sezimderi qaida qaldy? Árine, bul qasietter joǵalyp ketken joq, tek olar týraly adamdar qazir az aitady.
«Sondyqtan óz oqiǵalarymyzben bólisip, ainalamyzda qansha qamqor adam bar ekenin kóreiik!», - deidi Adina Hamar.
