Qazaqstandyq kompaniialar shyǵarǵan 866 jasandy tynys alý apparaty elimizdiń qalalaryna jetkizildi, dep habarlaidy "Ult aqparat" QR Indýstriia jáne ifraqurylymdyq damý ministrliginiń baspasóz qyzmetine silteme jasap.
Baspasóz qyzmetiniń málimetterine qaraǵanda, búgingi tańda el óńirlerine 866 (58%) jasandy tynys alý apparaty jetkizildi. Sondai-aq, 494 danasy (33 %) tiisti jerlerine jiberilip, 140 apparat (9 %) daiyn tur.
Apparattardyń barlyǵyn biylǵy 15 qazanǵa deiin jetkizip, olardy iske qosý josparlanǵan.
Qazaqstanda memlekettiń qatysýymen «Qazaqstan Aselsan injiniring» JShS (Nur-Sultan qalasy) jáne «Tynys» AQ (Kókshetaý qalasy) kásiporyndary jasandy tynys alý apparattaryn shyǵarady.
Bul kásiporyndar - «Qazaqstan injiniring» ulttyq kompaniiasynyń enshiles uiymdary.
Koronavirýs pandemiiasyna bailanysty elde qalyptasqan epidemiologiialyq jaǵdaiǵa orai jasandy tynys alý apparattarynyń jetispeýshiligin eskerip, «Qazaqstan Aselsan injiniring» JShS qysqa ýaqyt ishinde ókpeni jasandy jeldetetin statsionarlyq apparattar óndirisin igerdi.
Al «Tynys» AQ «Kókshetaý-4P» ókpeni jeldetetin 680 mobildi apparat shyǵaryp, meditsinalyq mekemelerge jetkizdi.
Meditsina mamandarynyń pikirinshe, bul apparattar qoldanýǵa yńǵaily, senimdi jáne elektr qýatyna táýeldi emes.
Kásiporynnyń óndiristik qýaty aiyna 500 apparat shyǵarýǵa jetedi.
Odan bólek, «Tynys» AQ «Kókshetaý 3» jasandy tynys alý portativti apparattaryn, sondai-aq meditsinalyq buiymdardyń túrli nomenklatýrasyn, onyń ishinde kóp rettik betperdelerdi, múgedekterge arnalǵan arbalardy jáne t.b. shyǵarady.
«Bul kásiporyndardyń negizgi qyzmeti Qazaqstan Respýblikasynyń jáne ózge de elderdiń Qarýly Kúshteriniń qajettilikteri úshin joǵary tehnologiialyq ónimder shyǵarýǵa baǵyttalǵan. Al jasandy tynys alý apparaty óndirisi meditsinalyq mekemelerdiń qajettilikteri úshin memlekettik tapsyrys aiasynda jolǵa qoiyldy. Kásiporyndar qosymsha qajettilik týyndaǵan jaǵdaida meditsinalyq tehnika men kez kelgen ónimdi qajet mólsherde óndirip, jetkize alady» - delingen habarlamada.
