Foto: Ratel.kz
"Eger elimizde sheteldik agentter týraly zań qabyldaýdy usynsa, biz óz saraptamamyzdy júrgizemiz", dep málimdedi Qazaqstannyń adam quqyqtary jónindegi ýákili Artýr Lastaev. Bul týraly Sputnik Qazaqstan aqparat agenttigi habarlady.
Qazaqstandyq ombýdsmenniń BUU Adam quqyqtary jónindegi joǵarǵy komissary Folker Tiýrkpen kezdesýinde jýrnalister Artýr Lastaevtan Qazaqstanda sheteldik agentter týraly zań paida bolýy múmkin be dep surady.
"Meniń bilýimshe, kún tártibinde mundai másele turǵan joq. Eger bul másele kóterilse, árine, óz saraptamamyzdy júrgizemiz. Bizdiń shtat úlken, tiisti beiindi bilimi bar adamdar bar. Biz baǵa beremiz, mindetti túrde óz pikirimizdi bildiremiz", - dedi ol.
Aita keteri, 2022 jyly Salyq kodeksiniń 29-babyna túzetýler engizildi. Oǵan sáikes, memlekettik kirister komiteti sheteldik kózderden aqsha nemese basqa da múlik alǵan tulǵalardyń tizimin jariialaidy. BAQ ókilderi bul sheteldik agentter týraly zańǵa alǵyshart emes pe dep surady.
"Memlekettik kirister organdary bul saiasatty qatań túrde salyq salý maqsatynda fiskaldyq múdde aiasynda júzege asyrady. Bizge ázirge fiskaldy saiasatty jeleý etip adamnyń quqyǵyn buzyp jatyr degen shaǵym túsken joq. Sol sebepti qazirgi tańda qandai da bir zańbuzýshylyq týraly aitý múmkin emes", - dep atap ótti ombýdsmen.
Eske salsaq, 7 naýryzda Tbiliside sheteldik agentter týraly zańnyń qabyldanýyna qarsy jappai narazylyq aktsiiasy ótti. Zań jobasy qarajattyń 20%-ten astamyn sheteldik kózderden alatyn keibir BAQ pen úkimettik emes uiymdardy "sheteldik yqpal etý agenti" dep tirkeýdi talap etken edi.
Quqyq qorǵaýshylar eki kún boiy parlamenttiń aldyndaǵy alańda mitingke shyqqandardy taiaq, jas aǵyzatyn gaz jáne sýatqyshtarmen qýyp tarqatty.
Nátijesinde Grýziia parlamenti daý týdyrǵan zańnan bas tartýǵa májbúr boldy.
