QR indýstriia jáne infraqurylymdyq damý vitse-ministri Amaniiaz Erjanov memlekettik qyzmetkerler úshin sheteldik avtokólik satyp alýǵa, sondai-aq shetelden transformator men kabel ákelýge tyiym salynatynyn aitty, dep habarlaidy Sputnik Qazaqstan tilshisi.
Vitse-ministr qaýly ótken aptada qabyldanǵanyn jetkizdi.
"Qujattaǵy tizimge avtomobil, transformator, kabel kirdi. 3 qaýymdastyq osy erejeni engizýge usynys jasady. Qaýly aiasynda 2 jyl boiy memlekettik satyp alýlar boiynsha tek otandyq ónimder alynýy qajet", - dedi Amaniiaz Erjanov úkimettiń baspasóz ortalyǵynda ótken baspasóz konferentsiiasynan soń.
Onyń pikirinshe, atalǵan shara osy salada jumys isteitin otandyq kásiporyndardyń damýyna yqpal etedi.
"Búgin kabel ónimin shyǵarý 80%-ke ósti. Qaraǵandy, Pavlodar, Atyraýdaǵy kásiporyndar talshyqty-optikalyq kabel júrgizýge qajetti ónimdi shyǵara alady. Bul ónimdi "Qazaqtelekom" kompaniiasy paidalanyp jatyr. Al osyǵan deiin importtyq ónimder jáne transformatorlar, avtomobilder shetelden satyp alynyp keldi", - deidi vitse-ministr.
Jýrnalister vedomstvo ókilinen qazirgi kezde nemis kóligimen júretin memlekettik qyzmetshiler, onyń ishinde ministrler qandai otandyq ónimdi paidalanatynyn surady.
Amaniiaz Erjanov elimizde Ravon, KIA, SsangYong kólikteri qurastyrylatynyn atap ótti. Eki jyldyq tyiym kezinde memlekettik qyzmetkerler osy modelderdi satyp alady eken.
"Ministrler Mercedes-pen júredi dep mysqyldaýǵa bolmaidy. Ol "Mersedester" buryn satyp alynǵan, olarǵa 10-15 jyl bolǵan", - dep jaýap berdi vitse-ministr.
Erjanov shetelden avtokólik ákelýdi shekteý elimizdegi kólik naryǵyndaǵy baǵalarǵa áser etpeitinin aitty.
"Avtokóliktiń baǵasy arzandamaidy. Sebebi, kez kelgen ónimdi shyǵarý kezinde shyǵyn bolady. Mysaly, avtobólshekter, shikizattardyń óz baǵasy bar. Ónimniń baǵasy shyǵynnyń esebinen quralady", - dep túsindirdi ol.
Onyń aitýynsha, baǵa óndiris elimizde bolǵanda, bólshekterdiń 50%-i Qazaqstanda jasalǵanda tómendeýi múmkin. Oǵan 3-5 jyl ýaqyt kerek.
"Onyń ózinde bul qarjylandyrý kózine jáne memlekettiń óndiriske qandai jaǵdai jasaitynyna bailanysty", - dep túiindedi vitse-ministr.
