Elimizde shamadan tys júk artyp jolǵa shyqqan 830-ǵa jýyq kólik anyqtaldy. Bul derek kóliktik baqylaý organdarynyń biylǵy I toqsandaǵy jumysynyń qorytyndysynda málim boldy, dep habarlaidy "Ult aqparat" QR IIDM baspasóz qyzmetine silteme jasap.
«2020 jyldyń 1 toqsanynyń qorytyndysy boiynsha kóliktik baqylaý organdary 28 032 júk avtokóligin tekserip, zań talaptaryn buzǵan 4 231 avtokólikti anyqtady. Onyń ishinde 219 sheteldik kólik quraly jol júrýge beriletin ruqsat júiesin buzǵan. 827 júk kóliginiń shamadan tys júkpen júrip ótýine tosqaýyl qoiyldy. Jalpy alǵanda 198 mln teńgege aiyppul salynyp, óndirildi», delingen habarlamada.
Sonymen qatar, atalǵan kezeńde 46 sharýashylyq sýbektisi tekserilip, 34 zań buzýshylyq anyqtaldy jáne 30 zań buzýshylyqty joiý týraly uiǵarym berildi. Kólik júrgizýshileriniń eńbek jáne demalys rejimin buzǵany úshin 2382 ákimshilik material resimdelip, 29 mln 245 myń teńge somasynda aiyppul óndirildi. Bul sharalar jalpy tasymaldaý (jolaýshylardy, júkterdi jáne qaýipti júkterdi tasymaldaý) qaýipsizdigine oń áser etip otyr.
