Qazaqstanda satyp alynǵan úsh kóliktiń ekeýi - otandyq kólik, dep habarlaidy "Ult aqparat" IIDM baspasóz qyzmetine silteme jasap.
Elimizde bir jylda 75 myń kólik shyǵaryldy. Oǵan barlyq tiptegi kólik quraly - avtomobil, júk kóligi, avtobýs, arnaiy tehnikalar kiredi.
«Jalpy, mashina jasaý salasyndaǵy avtomobil shyǵarý sektorynyń úlesi 2019 jylǵy 26,3% bolsa, 2020 jyly 33,4%-ke jetti. Óńdeý ónerkásibinde avtomobil jasaý úlesi 4,6% deiin ósti (2019 jyly-3,2%).
Jaqyn elderge 8 122 avtomobil eksporttaldy. Bul arǵy jyldyń kórsetkishinen 3 ese kóp. Onyń ishinde Resei, Ózbekstan, Belarýs jáne Qyrǵyzstanda Qazaqstanda shyǵarylǵan Hyundai, Chevrolet jáne JAC brendterine suranys joǵary», delingen habarlamada.
2020 jyly elimizdiń azamattary 93 myńnan astam jańa tehnika satyp alyp, arǵy jyldyń kórsetkishinen 25% asyp tústi (75 156).
«Osy rette elimizde satyp alynǵan úsh avtomobildiń ekeýi otandyq óndiris ónimi ekenin aitý kerek. Ótken jylǵy eń tanymal brendter Hyundai, Chevrolet jáne Toyota boldy. Eń tanymal bes brendtiń tórteýi otandyq óndiris ónimi (Hyundai, Chevrolet, Ravon jáne Lada).
2020 jyly avtomobil ónerkásibinde qol jetkizilgen tabysty kórsetkishterge Úkimet pen ministrlik tarapynan qabyldanǵan jáne otandyq zaýyttar iske asyrǵan naqty sheshimder oń áser etti», delingen habarlamada.
