«QazAvtoÓnerkásip» avtokólik salasyndaǵy kásiporyndar odaǵy biylǵy 9 aida avtokólik naryǵynyń baǵasyna qatysty esepti jariialady, dep habarlaidy "Ult aqparat".
«Esepti kezeńde qazaqstandyqtar 555,2 mlrd teńge 61 336 jańa jeńil jáne jeńil kommertsiialyq avtomobil satyp aldy. Osy jeńil kólikterdiń ortasha quny 10,5 mln teńgege jetip, ótken jyldyń sáikes kezeńine qaraǵanda 17 paiyzǵa ósti. Bul turǵyda qazaqstandyq óndirýshilerdiń usynyp otyrǵan ónimi naryqta eń qoljetimdi bolyp tur. Otandyq óndiris kóliginiń ortasha baǵasy 7,6 mln teńge shamasynda. Importtyq avtokóliktiń segmentinde tiisti kórsetkish 13,8 mln teńge deńgeiinde baiqaldy», - delingen habarlamada.
2020 jylǵy 9 aidyń qorytyndysy boiynsha satyp alýshylardyń tórtten birinen astamy (31,1%) 5 mln teńgeden qymbat emes kólikti tańdady. Bir jyl buryn osy segmentke naryqtyń 27,7 paiyzy tiesili boldy. 5-7 mln teńge turatyn 21,9 paiyz tehnika (13 409 kólik) ótkizildi. Sonymen qatar jańa kólik alǵandardyń 15,4 paiyzy 7-10 mln teńgeniń avtomobilderine nazar aýdardy.
Biznes (10-15 mln teńge) ári premiým sanattaǵy (15 mln teńgeden astam) segmentter sáikesinshe 20,6 paiyz (12 604 kólik) jáne 11,1 paiyzdy (6 779 kólik) qamtydy. Jalpy, 10 mln teńgeden qymbat tehnikanyń úlesi 6,4 paiyzdyq pýnktige tómendedi.
Eń qoljetimdi jeńil kólikterdiń ondyǵynda negizgi pozitsiialar qazaqstandyq kásiporyndarǵa tiesili boldy. Baǵasy arzan kólikterdiń arasynda Lada Granta kósh bastady, onyń quny 3 mln teńgeden bastalady. Sonymen qatar, osy TOR-10 quramyna Chevrolet Nexia (3,2 mln teńge), Ravon R2 (3,8 mln teńge), Ravon R4 (3,8 mln teńge), Chevrolet Cobalt (4,2 mln teńge), Lada 4x4 (4,3 mln teńge), Lada Vesta (4,6 mln teńge), Lada XRAY (5 mln teńge), JAC S3 (5 mln teńge) jáne Lada Largus (5,3 mln teńge) endi.
Al eń qymbat kólikterdiń reitingisinde Mercedes-Benz G-klass (110 mln teńge), Porsche 911 Turbo (82,7 mln teńge), Audi A7/A8 (79 mln teńge), Mercedes-Benz GLC-klass (56 mln teńge), Porsche Cayenne (53,7 mln teńge), Audi e-tron (50 mln teńge), Lexus LX (49,2 mln teńge), Mercedes GLE-klass (49 mln teńge), Land Rover Range Rover (44,9 mln teńge) jáne BMW 8 seriia (42,9 mln teńge) tirkeldi.
