Densaýlyq saqtaý ministri Eljan Birtanovtyń qatysýymen COVID-19 indetine qarsy kúres sharalaryn ázirlep, sanitarlyq-epidemiologiialyq qyzmetti jetildirý boiynsha jumys tobynyń otyrysy ótti, dep habarlaidy QazAqparat.
Jiynnyń ótkeni jaily ministrliktiń Facebook paraqshasynan habarlandy.
Otyrysqa ministrmen qatar Densaýlyq saqtaý vitse-ministri ári jumys tobynyń jetekshisi Liýdmila Biýrabekova, taýarlar men qyzmetterdiń sapasy men qaýipsizdigi komitetiniń tóraǵasy Timýr Sultangaziev, sondai-aq Densaýlyq saqtaý ministrligi departamentteriniń, respýblikalyq memlekettik kásiporyndardyń, ǵylymi-praktikalyq ortalyqtardyń, meditsinalyq ýniversitetterdiń ókilderi jáne Parlament Májilisiniń depýtattary qatysqan.
Otyrys barysynda negizgi eki másele, atap aitqanda densaýlyq saqtaý salasynyń kadrlyq áleýeti men sanitarlyq-epidemiologiialyq qyzmetti kúsheitý jumystary qaraldy.
«Eki máseleniń de aýqymynyń keń ekeni túsinikti. Alaida ondaǵy mindetterdi aldaǵy eki-úsh aida júzege asyrýǵa bolatyndai jumys júrgizý kerek», - dedi Eljan Birtanov.
Bas memlekettik sanitarlyq dáriger Aijan Esmaǵambetovanyń aitýynsha búginde Qazaqstanda sanitarlyq-epidemiologiialyq qadaǵalaý qyzmetin kúsheitýge baǵyttalǵan birqatar shara ázirlenip jatyr. Ózgerister alty baǵytta júrgiziledi. Máselen taýarlar men qyzmetterdiń sapasy men qaýipsizdigin baqylaý komitetinen sanitarlyq-meditsinalyq baqylaý qyzmetin jeke shyǵara otyryp, qaita qurý josparlanýda. Sonymen qatar bas memlekettik sanitarlyq dárigerdiń mártebesi men ókilettigi de artady. Epidemiologiialyq qyzmettiń shtat sany kóbeiip, epidemiologtar arnaiy memlekettik organ retinde artyqshylyqtarǵa ie bolady. Osy sharalardyń aiasynda memlekettik shekarada sanitarlyq-karantindik baqylaýdy kúsheitip, sanitarlyq-epidemiologiialyq qyzmetterdiń materialdyq-tehnikalyq jabdyqtalýyn jaqsartý kózdelgen. Iaǵni olar teplovizormen, kólik quraldarymen jáne keńse jabdyqtarymen jaraqtandyrylady.
«Sonymen qatar bas memlekettik sanitarlyq dárigerdiń ókileti keńeitilip, endi ol óz Qaýlysymen eldiń búkil aýmaǵynda shekteý sharalaryn engizip, qaita alyp tastai alady. Bul rette normativti-quqyqtyq akt memlekettik tirkeýge jatpaidy. Qazirgi ýaqytta osy jaǵdai kedergi keltirip tur. Sebebi ózgerister bir-aq apta ishinde engenimen, tirkeý úrdisi odan da uzaq ýaqytty alyp jatyr. Bas memlekettik sanitarlyq dáriger memlekettik shekara arqyly ótkizý beketinen kirgizý jáne shyǵarý boiynsha shekteýlerdi engize alady. Karantin aýmaǵyn belgilep, kúzetilgen aýmaqta epidemiiaǵa qarsy sharalardy tolyqqandy úilestiredi», - delingen habarlamada.
