2022 jyldyń kúzinde Qazaqstanda Reseidiń «MIFI» Ulttyq iadrolyq zertteý ýniversiteti (Almaty qalasynda) men I.M. Gýbkin atyndaǵy Resei memlekettik munai jáne gaz ýniversitetiniń (Atyraý qalasynda) filialdary ashylmaq. Úkimet tiisti qaýly qabyldady, dep habarlaidy "Ult aqparat" primeminister.kz saityna silteme jasap.
Biyl qazan aiynda atalǵan joǵary oqý oryndary filialdarynyń bazasynda «Qorǵalǵan joǵary ónimdi esepteý júieleri», «Elementar bólshekter fizikasy jáne ǵarysh fizikasy», «Munai men gazdy izdeý jáne barlaý», «Munai jáne gaz ken oryndaryn igerý, paidalaný jáne keshendi mehanikalandyrý men avtomattandyrý», «Munai jáne gaz tasymaldaý» siiaqty mamandyqtar boiynsha kadrlardy daiyndaý bastalady. Oǵan 200 grant bólindi. Oqý protsesine jetekshi reseilik professorlar tartylmaq.
«Kásibi kadrlardy daiarlaý men ǵylymi zertteýlerdi uiymdastyrýda joǵary oqý oryndaryn álem elderiniń tájiribesimen ushtastyrý jáne yntymaqtastyq aýqymyn keńeitý zamanaýi bilim berý tehnologiialaryn keńinen engizýge múmkindik beredi. Tehnikalyq kadrlardy daiyndaý jaǵynan reseilik ǵylym álemdegi eń úzdikterdiń biri sanalady. Sondyqtan bul tájiribe bizge óte paidaly», — dedi QR ǵylym jáne joǵary bilim ministri Saiasat Nurbek.
Elimizde reseilik joǵary oqý oryndary filialdarynyń ashylýy qazaqstandyq jastarǵa elden shyqpai-aq jetekshi sheteldik joǵary oqý oryndarynyń diplomyn alýǵa múmkindik beredi.
Eske sala ketsek, Memleket basshysy elimizde 2025 jylǵa deiin sheteldik joǵary oqý oryndarynyń 5 jańa filialyn ashý týraly tapsyrma bergen bolatyn. 2022 jyldyń aqpan aiynda QR Bilim jáne ǵylym ministrligi men RF Ǵylym jáne joǵary bilim ministrligi arasynda ózara yntymaqtastyq týraly memorandýmǵa, sondai-aq QR Úkimeti men RF Úkimeti arasynda eki eldiń joǵary oqý oryndarynyń filialdaryn ashý týraly kelisimge qol qoiylǵan.
