QR Premer-Ministriniń orynbasary Eraly Toǵjanov Qazaqstanda PTR-testileý baǵasyn arzandatý jospary týraly aityp berdi, dep habarlaidy "Ult aqparat".
«Meniń oiymsha, PTR (test – red.) baǵasy qymbattamaidy. Birinshiden, bizdiń azamattar vaktsinany tańdaidy dep oilaimyn. Oǵan bek senimdimin. Qazirgi vaktsinalaý qarqyny da osyny aiǵaqtaidy. Ekinshiden, PTR-testileýdiń ortasha baǵasy 7-8 myń teńge deńgeiinde. Jaqynda ǵana vedomstvoaralyq komissiiada kásipkerler baǵany arzandatyp, ári qarai Eýropa elderinde qoldanylatyn jańa PTR-testini alýdy usyndy. Olar jańa tásilder usynyp otyr. Densaýlyq saqtaý ministrligi Básekelestikti qorǵaý jáne damytý agenttigimen jáne kásipkerlermen birge bul máseleni qarastyryp jatyr. Sondyqtan, eń aldymen, biz baǵany tómendetý múmkindigin qarastyramyz», - dep jaýap berdi spiker Ortalyq kommýnikatsiialar qyzmetinde tilshi suraǵyna.
Sondai-aq, Premer-Ministrdiń orynbasary vaktsinalaýǵa qatysty aqparattyq jumysqa baǵa berdi.
«Ózderińiz bilesizder, búginde Qazaqstanda jalpy jaǵdai turaqtalǵan. Kúndelikti ósim 1200 adam deńgeiinde, meniń oiymsha, bul óte mańyzdy nátijeler. Biz qabyldaǵan sharalar sońǵy jaǵdaiǵa bailanysty bolyp otyr. Bizdiń áreket etpeýge quqyǵymyz joq, onyń ústine Qazaqstanda barlyq belgileri bar aiqyn qaýip tónip tur. Aqparattyq-túsindirý jumystary barlyq jerde júrip jatyr. Biraq biz munyń jetkiliksiz ekenin túsinemiz jáne qosymsha sharalar qabyldaýǵa májbúrmiz. Bul birinshi kezekte azamattarymyzdyń qaýipsizdigin, densaýlyǵyn qorǵaý men qamtamasyz etýge baǵyttalǵan. Osy turǵydan bizdi durys túsinýlerińizdi suraimyn», - dedi Eraly Toǵjanov.
