Qazaqstanda plastik bótelkeler men plastik oramalardy qaita óńdeý jolǵa qoiylyp keledi. Bul týraly «Turaqty damýǵa járdemdesý» ortalyǵynyń jobalar jónindegi menedjeri Iýliia Dýshkina aitty, dep habarlaidy "Ult aqparat".
«Túrli plastik ónimder óndirisiniń kólemi artyp keledi. UNEP málimetterine sáikes, 500 mlrd tonna plastik paketter qoqysqa tastalady jáne minýt saiyn 1 mln plastik bótelke satyp alynady eken. Ókinishke orai, osynaý ónimniń aitarlyqtai bóligi birinshi ret paidalanylǵannan keiin qoqysqa ketedi. Alaida, plastik óte qundy ári qaitalama shikizat sanalady. Sondyqtan qaitadan shikizat, jańa ónim alý úshin, qorshaǵan ortaǵa ziian kólemin tómendetý úshin ony kádege jaratýymyz qajet», - dedi ol plastik qaldyqtaryn jinaý jáne qaita óńdeý taqyrybyna arnalǵan dóńgelek ústel otyrysy barysynda.
Onyń dereginshe, elimizde de plastik qaldyqtar óte kóp. Máselen, tek 2018 jyldyń ózinde ǵana shamamen 480 myń tonna plastik qaldyqtary jinalǵan. Al «Operator ROP» JShS málimetterine sáikes, 2016 jyly elimizde jinalǵan plastik qaldyqtardyń salmaǵy 283 myń tonnany quraǵan.
«Bul rette 2017 jyly elimizde jinalǵan plastik qaldyqtardyń shamamen 6 tonnasy nemese jalpy kólemniń 2 paiyzy ǵana óńdelgen. Al 2018 jyly qaita óńdelgen plastik kólemi 9 myń tonnany nemese 3 paiyzdy qurady. Bul tómen kórsetkish jáne plastik pen plastik qaptamalardy shyǵarýshylardan bastap barlyq tarap ony qaita kádege jaratýǵa múddeli bolýy tiis», - dedi Iu.Dýshkina.
Aita keterligi, 2018 jyly Qazaqstan aýmaǵynda 4,3 mln tonna turmystyq qatty qaldyq jinalǵan. Onyń 11,2 paiyzy nemese 481 myń tonnadan astamyn plastik qaldyqtar quraidy.
