Qazaqstanda ótken 2 jylda 39 IT-litsei ashyldy. Búginde bul bilim ordalarynda 55 myńǵa jýyq oqýshy bilim alyp jatyr, dep habarlaidy BǴM baspasóz qyzmeti.
IT-litseiler jańa modifikatsiialyq úlgidegi kabinettermen jáne zamanaýi IT quraldarmen jabdyqtalǵan. Balalar úshin aqparattyq-kommýnikatsiialyq tehnologiialardy tereń zertteýge baǵyttalǵan arnaiy bilim berý baǵdarlamalary ázirlendi.
Atalǵan bilim berý baǵdarlamalarymen 7-11 synyp oqýshylary qamtylǵan. Mamandandyrylǵan IT litseilerde oqýǵa niet bildirgen bilim alýshylar túsý emtihandaryn tapsyrady.
Oqýshylar baǵdarlamalaý daǵdylary, 3D dizain, robototehnika jáne basqa da baǵyttar boiynsha bilim alady.
Osyndai litseilerdiń ashylýy, jańa bilim berý baǵdarlamalaryn engizý, sondai-aq pedagogterdiń qoldaýynyń nátijesinde IT-litseilerdegi bilim alýshylar tsifrlyq startaptar quryp, óz jobalaryn ázirlep jatyr. Sonymen birge Qazaqstandy álemdik arenada laiyqty deńgeide tanytyp keledi.
Mysaly, Kókshetaý qalasyndaǵy IT-litseidiń oqýshysy Caspian Start-UP 2021 Halyqaralyq ǵylymi jobalar baiqaýynda jeńiske jetti. Baiqaýǵa Kaspii mańy elderinen 90-ǵa jýyq oqýshy men kolledj stýdentteri qatysty. Jas daryn ieleri innovatsiialyq tehnologiialar salasyndaǵy ózderiniń avtorlyq jobalaryn tanystyrdy.
«Elimizde osyndai mamandandyrylǵan IT-litseilerdiń ashylǵanyna qýanyshtymyn. Nátijesinde biz barlyq tsifrlyq tehnologiiany sapaly túrde zertteimiz. Máselen, men startaptar baiqaýynda ózimniń avtorlyq jobamdy tanystyrdym. Maǵan kómektesken muǵalimderim men ǵylymi jetekshime alǵysym sheksiz. Qol jetkizgen jetistikterim laiyqty baǵalanyp, bilim berý grantyn alǵanyma qýanyshtymyn», – dedi Caspian Start-UP 2021 jeńimpazy Asylhan Qoshanov.
