Densaýlyq saqtaý ministri Eljan Birtanov Ulttyq ǵylymi onkologiia ortalyǵy qai jerde salynatynyn aityp berdi, dep habarlaidy QazAqparat.
«Ulttyq ǵylymi onkologiia ortalyǵy jobasynyń kesheýildep qalýyna bailanysty syn da aitylǵan edi. Ol jobamen Nazarbaev Ýniversiteti ainalysqan. Ótken jyldan bastap jobanyń parametrlerin qaita qarap, qazirgi ýaqytta qai jerde salatyndyǵyn aiqyndadyq. Basqa da ǵylymi ortalyqtarmen integratsiia barynsha myǵym bolýy úshin biz turǵyzylatyn jańa oryndy belgiledik», - dedi Eljan Birtanov Parlament Senatynda Úkimettik saǵattan keiin tilshilerdiń suraǵyna jaýap bere otyryp.
Ministrdiń aitýyna qaraǵanda, ortalyq – burynǵy Meditsinalyq holdingtiń aýmaǵynda salynady. Iaǵni, ol – Ulttyq kardiohirýrgiia ortalyǵy, Ulttyq neirohirýrgiialyq ortalyq pen Ulttyq ǵylymi onkologiia jáne transpontologiia ortalyǵy turǵan meditsinalyq keshen aýmaǵynda boi kóteredi.
«Ulttyq ǵylymi onkologiia jáne transpontologiia ortalyǵy Ulttyq ǵylymi onkologiialyq ortalyq bolyp transformatsiialanǵan edi. Sol ortalyqtyń aýmaǵynda qazirgi ýaqytta men aitqan nysannyń qurylysy júrip jatyr. Sonymen birge, onyń janynda Nazarbaev Ýniversitetiniń Meditsinalyq mektebi tur. Iaǵni, bul onkoortalyqtyń salynýy – jetekshi tehnologiialarǵa qol jetkizýge múmkindik beredi», - dedi ol.
Eljan Birtanov nysan qurylysy boiynsha merdiger bekitilgenin, ol merdigerdiń – Ulttyq kardiohirýrgiia ortalyǵy men Ana men bala ortalyǵyn salǵan «Deloid Injiniring» kompaniiasy ekenin atap ótti.
«Osy ortalyqtyń aiasynda Ortalyq Aziiadaǵy birden-bir protondy terapiia ortalyǵy ashylady. Bul – shaǵyn isikterdi emdeitin jańasha tehnologiia. Ortalyqtyń emdeý korpýsynyń qurylysyn 2020 jyldyń sońynda aiaqtaýdy kózdep otyrmyz. Protondy terapiia ortalyǵy kúrdeli bolǵandyqtan, onyń qurylysy shamamen 2021 jyldyń ortasynda aiaqtalady. Jobanyń jalpy quny – 70 mlrd teńge», - dedi ol.
