Qazaqstan Respýblikasynyń Syrtqy ister ministri Beibit Atamqulovtyń Koreia Respýblikasyna resmi sapary ótýde. Bul týraly "Ult aqparat" SIM baspasóz qyzmetine silteme jasap habarlaidy.
Qazaqstannyń syrtqy saiasi vedomstvosynyń basshysy Ońtústik Koreia basshylyǵymen birqatar kezdesýler ótkizdi, atap aitqanda Premer-Ministr Li Nak Ion, Ulttyq Assambleianyń (Parlament) spikeri Mýn Hi San, BUU eks-Bas hatshysy Pan Gi Mýn, sondai-aq Syrtqy ister ministri Kan Gen Hva men Saýda, indýstriia jáne energetika ministri Son Iýn Momen kelissózder júrgizdi.
Kezdesýler barysynda taraptar ekijaqty yntymaqtastyq pen halyqaralyq kún tártibiniń aǵymdaǵy máselelerin, saiasi, saýda-ekonomikalyq, investitsiialyq, áleýmettik, mádeni-gýmanitarlyq jáne ózara is-qimyldyń basqa da salalaryndaǵy qatynastardy damytý perspektivalaryn, sondai-aq Korei túbegindegi jaǵdaidy talqylady.
Korei Úkimetiniń basshysymen kelissózder barysynda taraptar joǵary deńgeide saiasi dialogty qoldaýdyń mańyzdylyǵyn atap ótti. «Koreia Respýblikasy biz úshin Aziiadaǵy negizgi strategiialyq seriktesterdiń biri bolyp tabylady jáne biz saiasi ózara is-qimylymyzdyń deńgeii osy mártebege sáikes keletinin qanaǵattanýshylyqpen atap ótemiz», - dedi B. Atamqulov.
Qazaqstan SIM basshysy korei tarapyn eldegi mańyzdy ishki saiasi úderister týraly habardar etti jáne Qazaqstan burynǵydai Ońtústik Koreiamen ózara tiimdi qarym-qatynasty keńeitýge jáne nyǵaitýǵa umtylatyn bolady dep sendirdi. Jańadan sailanǵan Memleket basshysy tájiribeli saiasatker jáne tanymal diplomat bolyp tabylatyn Qasym-Jomart Toqaev Qazaqstan-Korei qarym-qatynastarynyń sabaqtastyǵy men joǵary serpinin saqtaidy.
Biylǵy jyly Qazaqstan men Ońtústik Koreia arasyndaǵy strategiialyq áriptestikti ornatýǵa 10 jyl tolady. Osy jyldyń sáýir aiynda bolǵan Koreia Respýblikasynyń Prezidenti Mýn Chje Innyń Qazaqstanǵa memlekettik sapary osy kezeńniń mańyzdy indikatory boldy.
«Sizdiń elińiz Tuńǵysh Prezident Nursultan Nazarbaevtyń basshylyǵymen óz ekonomikasyn yryqtandyrýda úlken tabystarǵa qol jetkizip, endi ony órkendeý kútip tur. Biz Qazaqstanmen jan-jaqty yntymaqtastyqty damytýǵa daiynbyz», - dedi Premer-Ministr Li Nak Ion.
Ulttyq Assambleiada taraptar parlamentaralyq bailanystar máselelerin talqylap, olardy nyǵaitý, saiasi dialogtyń joǵary deńgeiin qoldaý jáne zań shyǵarý qyzmeti salasynda tájiribe almasý qajettiligi týraly kelisti.
Koreia Respýblikasy men Resei Federatsiiasy bastamashylary bolyp tabylatyn «Úlken Eýraziia: Dialog. Senim. Seriktestik» atty Eýraziia elderi Parlamentteri spikerleriniń jinalysyna daiyndyq jumystary talqylandy. Ulttyq Assambleianyń tóraǵasy Mýn Hi San osy jyldyń 23-24 qyrkúieginde Nur-Sultan qalasynda ótetin atalǵan jinalysqa óziniń qatysýyn taǵy da rastady. Sonymen qatar, qazaqstandyq tarap korei tarapyna is-sharany uiymdastyrýǵa kórsetken qoldaýy úshin alǵysyn bildirdi.
BUU burynǵy Bas hatshysy Pan Gi Mýnmen kezdesý dostyq jaǵdaida ótti. Suhbattasýshy QR Tuńǵysh Prezidenti - Elbasy Nursultan Nazarbaevqa jyly lebizin bildirip, búkil álem syilaityn saiasatker retinde onyń baǵa jetpes talantyn erekshe atap ótti. Onyń pikirinshe, Elbasynyń iadrolyq qarýdan bas tartý sheshimi adamzat tarihyna engeni sózsiz. Korei diplomaty Qasym-Jomart Toqaevty prezidenttik qyzmetke sailanýymen quttyqtap, onymen halyqaralyq bedeldi uiymda qyzmetti birge atqarǵan BUU qurylymyndaǵy Qazaqstannyń jarqyn ókilderiniń biri bolǵanyn atap ótti.
Qazaqstan SIM basshysy qazaqstandyq basshylyqtyń atynan jyly lebizin bildirip, Pan Gi Mýnǵa elimizdiń syrtqy saiasi bastamalaryna kórsetken qoldaýy úshin alǵysyn bildirdi.
Qazaqstan men Ońtústik Koreia SIM basshylarynyń kelissózderi barysynda taraptar ekijaqty jáne halyqaralyq ózekti máseleler boiynsha ustanymdardyń uqsastyǵyn atap ótti. Qazaqstan men Ońtústik Koreia arasynda eshqandai saiasi kelispeýshilikter joq, halyqaralyq uiymdar men kópjaqty forýmdar sheńberinde syndarly ózara is-qimyl júzege asyrylýda.
Qazaqstan SIM basshysy qazaqstandyq taraptyń Koreia Respýblikasymen yntymaqtastyqty jan-jaqty damytýǵa erekshe mán beretinine nazar aýdardy. Taraptar aldaǵy is-sharalar kestesin, atap aitqanda aǵymdaǵy jyldyń qazan aiynda Qazaqstanda ótetin «Ortalyq Aziia - Koreia Respýblikasy» forýmyna daiyndyq barysyn talqylady.
Saýda, indýstriia jáne energetika ministri Son Iýn Momen kezdesýde saýda-ekonomikalyq, investitsiialyq jáne tehnologiialyq yntymaqtastyqqa nazar aýdaryldy.
Koreia biz úshin eń basym elderdiń biri, sondai-aq Aziiadaǵy ekinshi saýda seriktesi bolyp tabylady. Taýar ainalymy men investitsiialyq yntymaqtastyqtyń belsendi ósýi ózara is-qimyldyń joǵary deńgeiin kórsetedi. 2018 jyly taýar ainalymynyń kólemi 4 mlrd AQSh doll. qurady, al 2019 jyldyń birinshi jartysynda 2,7 mlrd dollarǵa jetip, bul ótken jyldyń sáikes kezeńiniń kórsetkishterinen eki ese artyq ekenin kórsetedi.
Koreia tarapy elimizdegi investitsiialyq ahýaldy jetildirý saiasatymen egjei-tegjeili tanysyp, Qazaqstan ekonomikasyna belsendi investitsiia salýǵa shaqyrdy. 2005 jyldan bastap 2019 jyldar aralyǵynda Koreia QR ekonomikasyna 5,3 mlrd. dollar saldy.
Taraptar Koreia Respýblikasy Prezidentiniń Qazaqstanǵa sapary barysynda qol qoiylǵan «Jańa jel» baǵdarlamasyn iske asyrý jónindegi Jumys tobynyń qyzmeti máselelerin talqylaýǵa egjei-tegjeili toqtaldy. Toptyń birinshi otyrysyn qyrkúiek aiynyń sońynda Qazaqstan astanasynda ótkizý josparlanyp otyr, ony úilestirýdi Qazaqstan tarapynan Indýstriia jáne infraqurylymdyq damý ministrligi, al korei tarapynan - Saýda, indýstriia jáne energetika ministrligi júrgizedi.
Sonymen qatar, Qazaqstan SIM basshysy Ońtústik Koreianyń iri biznes ókilderimen, atap aitqanda «Kolon», «Samsung Electronics», «Doosan Heavy Industry», «Hyosung Corporation Group» jáne «Hyundai Heavy Industries» atty kompaniialardyń basshylyǵymen birqatar kezdesýler ótkizdi. Korei kásipkerleri mashina jasaý, aqparattyq-kommýnikatsiialyq tehnologiialar jáne munai himiiasy salalaryndaǵy investitsiialyq yntymaqtastyqtyń joǵary áleýetin atap ótti.
