Qazaqstanda óndiristik jaraqattaný 8,8 paiyzǵa tómendedi, dep habarlaidy "Ult aqparat".
«2019 jyldyń qorytyndysy boiynsha respýblika kásiporyndarynda 1 257 jazataiym oqiǵa boldy, sonyń saldarynan 1 430 adam zardap shekti. Bul 2018 jylǵy kórsetkishten 8,8 paiyzǵaǵa tómen (2018 jyly – 1 568 adam), onyń ishinde 180 adam qaza tapqan, bul 2018 jylǵa qaraǵanda 17,6 paiyzǵa tómen (2018 jyly - 220 adam)», - delingen Eńbek jáne halyqty áleýmettik qorǵaý ministrligi málimetinde.
Ekonomika salalary bólinisinde zardap shekkenderdiń eń kóp sany taý-ken metallýrgiia kesheni kásiporyndarynda – 244 nemese 17,1 paiyz jáne qurylys salasynda – 176 nemese 12,3 paiyz qurady.
«Óndiristik jaraqattanýdyń joǵary deńgeii Shyǵys Qazaqstan (zardap shekkender 212 adam), Qaraǵandy (189 adam), Pavlodar (117 adam), Qostanai (114 adam) oblystarynda jáne Almaty qalasynda (111 adam) saqtalýda», - dep atalyp ótken habarlamada.
Eńbekti qorǵaý salasynda eń jii jol beriletin buzýshylyqtar: qaýipsiz eńbek jaǵdailaryn qamtamasyz etpeý – 14,9 paiyz (353); qyzmetkerlerge oqytý men nusqama júrgizbeý – 14,3 paiyz (340); jeke jáne ujymdyq qorǵaný quraldarymen, arnaiy kiimmen jáne arnaiy aiaq kiimmen qamtamasyz etpeý – 10,1 paiyz (238).
Jazataiym oqiǵalardyń kópshiligi mynalarǵa bailanysty boldy: qozǵalatyn, ainalatyn zattardyń áseri (199 nemese 13,9%); zardap shegýshiniń biiktikten qulaýy (171 nemese 11,9%); zattardyń, materialdardyń qulaýy (152 nemese 10,6%).
