Qazaqstanda óndirilgen taýarlardy álemniń 120-dan astam eli tutynady, dep habarlaidy "Ult aqparat" Indýstriia jáne infraqurylymdyq damý ministrliginiń baspasóz qyzmetine silteme jasap.
Osydan 10 jyl buryn elimizde indýstriialyq-innovatsiialyq damýdyń alǵashqy memlekettik baǵdarlamasy qabyldandy. Ol alǵashynda álemdik ekonomikadaǵy daǵdarysqa qarsy shara retinde bastalyp, elimizdiń óńdeý ónerkásibin dáiekti túrde damytýdyń tiimdi quralyna ainaldy.
«Sodan bergi 10 jyl ishinde otandyq ónerkásip salasynda eleýli jetistikterge qol jetkizildi. Atap aitqanda, indýstriialyq-innovatsiialyq damytýdyń baǵdarlamalary aiasynda 1250 joba iske qosyldy. 195 myńdai jumys orny ashyldy, onyń ishinde 120 myń turaqty, 75 myń ýaqytsha jumys orny. Qazaqstanda buǵan deiin óndirilmegen 500-den astam ónim túri shyǵaryla bastady. Óńdeý sektorynyń ónerkásip qurylymyndaǵy úlesi 2009 jyly - 32% bolsa, 2018 jyly - 38% jetti, al investitsiiadaǵy úlesi 17%-ten 19%-ke artty. Óndiris kólemi naqty kórsetkishte 42,3% artty. Ósimge eń úlken úles qosqan salalar: metallýrgiia ónerkásibi (42%), azyq-túlik óndirisi (13,7%), mashina jasaý (10,7%) jáne qurylys materialdary óndirisi (10%)» delingen habarlamada.
Osy kezeńde otandyq ekonomikaǵa 32 mlrd AQSh dollarynan astam tikelei shetel investitsiiasy tartyldy.
Óńdeý ónerkásibiniń qurylymy ózgerdi: avtomobil ónerkásibi, iri temir jol mashinasyn jasaý, munai-gaz salasyna mashina jasaý, kúrdeli tyńaitqyshtar óndirisi siiaqty jańa baǵyttar qosyldy.
«Titan quimasy men qorytpasyn óndiretin zaýyt ashylǵan soń buǵan deiin Qazaqstanda óndirilmegen ónim – titan quimasy men qorytpalar óndirisi jolǵa qoiyldy. Qazaqstan titanynyń álemdik naryqtaǵy úlesi 11%, áýe-ǵarysh salasynda 17%-ke jetti. Mashina jasaý salasyndaǵy ónerkásip kólemi 3,8 ese ulǵaidy. 11 farmatsevtikalyq kásiporynnyń 20 óndiristik alańynda GMP halyqaralyq standarttary engizildi» dep málim etti ministrlikten.
Qurylys materialdary óndirisi salasy kóptegen ónim túrleri boiynsha importqa táýeldilikten qutyldy. Indýstriialandyrý jyldary shikizattyq emes 70 taýar túri boiynsha óndiris kólemi ulǵaiyp, eksport jolǵa qoiyldy.
Búgingi tańda Qazaqstanda óndirilgen taýarlardy álemniń 120-dan astam elinde tutynady.
