Ótken jyly Qazaqstanda jasóspirimderge dárilik esirtki zattaryn satqan 101 dárihananyń basshysy jaýapqa tartyldy, dep habarlaidy Sputnik Qazaqstan tilshisi.
QR IIM Esirtki qylmysyna qarsy is-qimyl departamenti basqarmasynyń basshysy Berikhan Nurǵalievtiń aitýynsha, qazirgi tańda respýblika boiynsha esirtki qoldanatyn 128 jasóspirim tirkeýde tur. Olardyń eń kishisi — 14 jasta. Esirtki qoldanatyn oqýshylardyń deni Astana, Almaty sekildi iri qalalarda tirkelgen.
"Buryndary geroin, kóknár sekildi esirtki túrleri kóp satylǵan. Sebebi shekara jabyq, esirtki Túrkiia, Siriia, Irak jaqpen ainalyp ketip jatyr. Biraq búginde sintetikalyq esirtki degen úlken problema bar. Onyń paida bolǵanyna úsh jyldai ýaqyt boldy. Byltyr elimizde esirtkini jarnamalaǵan 4,5 myń sait anyqtalyp, jabyldy", — dedi Nurǵaliev Astanadaǵy mektepte sintetikalyq esirtkiler men dárilik esirtki zattarymen kúres jóninde ótken sharada.
Onyń aitýynsha, álemde bir minýtta esirtki jarnamalap, taratatyn 3 myń sait paida bolady. Al olardyń artynda kim turǵanyn anyqtaý óte qiyn.
"Esirtki satatyn internet dúkender bir ǵana Qazaqstanda qurylmaidy. Bul búkil álemge ortaq problema búginde. Sondyqtan ishki ister organdary esirtkige qarsy kúresti álemdik qaýymdastyqpen birlesip júrgizedi", — deidi basqarma basshysy.
Nurǵaliev qazirgi tańda keń taraǵan dárilik esirtki zattardy satý máselesine toqtaldy.
"Búgingi kúni "tramadol nashaqorlyǵy" degen óte ózekti másele bar. Sizder bilesizder, tramadol dárihanalarda retsept boiynsha satylady. Biraq ony jasóspirimder de alýy múmkin. Sondyqtan ishki ister ministrligi tramadol siiaqty dárilik esirtki zattaryn baqylaýǵa almaqshy.
Aitýynsha, byltyr Qazaqstanda dárilik esirtki zattaryn jasóspirimderge satqan 101 dárihana basshysy jaýapqa tartylǵan.
"Mektepte esirtki satyp, ustalǵan direktorlar joq", — dedi basqarma basshysy.
Nurǵaliev biyldan bastap esirtki týraly zań kúsheitilgenin, tiisinshe esirtki satatyndardyń jazasy qatańdaǵanyn atap ótti.
"Osy jyldan bastap sintetikalyq esirtkini taratqandar qylmystyq jazaǵa tartylady. Tipti ómir boiyna bas bostandyǵynan aiyrylýy da múmkin. Esirtkini qoldanǵandar úshin de ákimshilik jáne qylmystyq jaza qarastyrylǵan", — dedi ol.
Buǵan qosa, ol esirtki saittarynyń ataýy kórsetilgen grafiti jazbalar úshin 50 myń teńge aiyppul salynatynyn aitty.
