QR Mádeniet jáne sport ministrligi 2020 jylǵy qazan aiynan bastap mektep oqýshylarynyń adamgershilik jáne rýhani turǵyda damýyna baǵyttalǵan «Ulaǵatty urpaq» mádeni-bilim berý jobasyn iske qosady, dep habarlaidy "Ult aqparat".
Vedomstvo málimetinshe, baǵdarlama uzaqtyǵy 10-15 minýttan turatyn 1-11 synyp oqýshylary úshin beine-dárister túrinde ázirlendi. Balalar úiden shyqpai-aq Qazaqstannyń kieli jerlerine virtýaldy túrde saiahattai alady. Sondai-aq opera, balet, drama óneriniń ozyq úlgilerin kórip, qazaqstandyq jáne shetel kinofilmderi men mýltfilmderin tamashalap, ásem mýzykalyq shyǵarmalardy tyńdai alady.
Oqýshylarǵa mmura.kz saitynda mýzykalyq óner, teatr óneri, kinomatografiia, beineleý óneri jáne Kieli Qazaqstan atty 5 baǵyt boiynsha qazaq jáne orys tilderinde barlyq bilim berý beine-dáristerine erkin qol jetkizýge múmkindik beriledi.
Ár beine-dáristiń sońynda oqýshylar úsh suraqqa jaýap bere otyryp, ózderin teksere alady. Balalardyń erikti túrde qatysýy osy jobanyń qaǵidatty sharty sanalady. Oqý jylynyń sońynda test suraqtaryna durys jaýap berip, joǵary upai jinaǵan eń belsendi qatysýshylardy syilyqtar men jaǵymdy tosynsyilar kútedi.
«Osyndai deńgeidegi joba jas jáne jańa bilimge qumar urpaq úshin baǵdar beredi, elimizdiń senimdi azamattaryn tárbieleýge kómegin tigizedi jáne jigerge toly jas júrekterdi jaýlap alady degen senimdemiz» - dep atap ótti uiymdastyrýshylar.
