Almatyda birinshi qyrkúiekten bastap 1-2 synyp oqýshylary úshin kezekshi synyptar ashyldy, al bul jerdegi epidemiologiialyq jaǵdaidy qalalyq densaýlyq basqarmasy, taýarlar men kórsetiletin qyzmetterdiń sapasy men qaýipsizdigin baqylaý komiteti baqylaityn bolady. Bul týraly Almaty qalasy bilim basqarmasy basshysynyń orynbasary Qairat Jumanov habarlady, - dep habarlaidy «Ult aqparat».
Onyń aitýynsha, kezekshi synyptar jumys isteitin ata-analardyń ótinishi boiynsha ashyldy. Aita ketý kerek, qaladaǵy bastaýysh synyptar úshin arnaiy túzetý mektep-internattarynda shtattyq rejimde jumys isteýge ruqsat berilgen.
#Kezekshi synyptardaǵy qoiylǵan talap
Eń aldymen, balasynyń kezekshi synypqa barýyn qalasa, ata-anasy mektep direktorynyń atyna ótinish jazýy kerek. Ony kez kelgen bailanys túrin paidalanyp synyp jetekshisi arqyly jiberedi. Kezekshi synyptaǵy basty talap – oqýshylar arasyndaǵy sanitarlyq-epidemiologiialyq talaptardy saqtaý.
Mektepte synypta on bes baladan artyq bala otyrmaidy, ár partada bir baladan otyrady. Onlain sabaq 15 minýttan 30 minýtqa deiin sozylady, kezekshi synyptarda sabaq qyryq minýt oqidy. Keste de balalar bir jerge kóp shoǵyrlanbaýy úshin jasalady, olar ártúrli ýaqytta úziliske shyǵatyn bolady.
#Oqýshylardyń kompiýter máselesi
Oqý jyly bastalmas buryn Almatyda oqýshylar men muǵalimderdiń kompiýterlik tehnikamen jabdyqtalǵanyna baqylaý-monitoring júrgizildi. Nátijesinde 75 myńnan asa bala men 2 myńnan asa muǵalimdi kompiýtermen qamtamasyz etý kerek ekeni anyqtaldy.
Almatynyń bilim basqarmasy bul máseleni sheshý úshin birqatar jumys júrgizip jatyr. Mysaly, jergilikti biýdjet qarjysynan 20 myńnan asa kompiýter satyp alynady. 38 myńnan asa kompiýter tehnikasy, onyń ishinde noýtbýk, planshet úkimettiń rezerv qorynyń qarjysyna alynady. Aita ketý kerek, jiyrma eki myńnan asa turmysy tómen otbasyǵa tehnikalyq qurylǵy satyp alynady. Oǵan biýdjetten qarjy bólinedi. Al on tórt myńnan asa oqýshyǵa tehnikalyq qurylǵy, kompiýterler ýaqytsha qoldanýǵa beriledi.
#Oqýlyqpen qamtamasyz etý
Almaty qalasy bilim basqarmasynyń habarlaýynsha, 2020-2021 oqý jylynda 1-11 synyp oqýshylaryna oqýlyq satyp alý úshin jergilikti biýdjetten 3,8 milliard teńge bólindi. Bul somaǵa kitapty jetkizý baǵasy da kiredi. Qalanyń barlyq oqýshysy júz paiyz tegin kitappen qamtamasyz etiledi.
#Mektep formasy
Bilim jáne ǵylym ministrliginiń habarlaýynsha, ata-analardyń sheshimi boiynsha oqýshylar mektepke erkin formada bara alady. Bul sheshimdi biryńǵai jalpy respýblikalyq pedagogikalyq keńes qabyldady. Keńestiń sheshimine sáikes, muǵalimderge kezekshi synyptarǵa barǵan balalardy oqytý erejesi, sonymen qatar synyptardaǵy sanitarlyq qaýipsizdik talaptary túsindiriledi.
Aita keteiik, elimizde mektep formasyna qoiylǵan talaptar joiylmaidy, alaida bul máselege qatysty ýaqytsha ózgerister engizildi. Kezekshi synyptarǵa ata-ana balalardy mektep formasynda nemese basqa yńǵaily kiimde jiberýdi ózderi sheshedi.
Sabaq aldynda oqýshylar men muǵalimderdiń dene qyzýy kún saiyn ólshenedi. Al eger adamnyń temperatýradan asyp ketse, oqýshy úiine qaitady, muǵalim jumysqa jiberilmeidi.
Bilim basqarmasy balalardyń WhatsApp jáne Telegram arqyly oqymaitynyn, tek onlain-oqytý jáne qosymsha bilim berý platformalarynda oqityndaryn habarlady. Onyń ishine Daryn-onlain, Bilim lend, Kúndelik sekildi platformalar kiredi.
Aita keteiik, 2020 jyly bilim kúni onlain formatta ótedi. Joǵary oqý oryndary, mektepter men kolledjder qashyqtan oqidy.
